Guang bơnga mơ̆ng Grŭp hmâo glông bôh hră čih “Khua mir sir Hồ Chí Minh, Khua git gai mơ̆ng mơnuih ƀôn sang dêh čar Việt Nam dô̆ hơdip na nao”. Hlâo adih, amăng hrơi blung a mơ̆ng tal hyu čuă, Khua git gai Ping gah, Khua mir sir dêh čar Khač Tập Cận Bình hmâo laih mông bơkơtuai gưl dlông truh kih hăng Khua git gai Ping gah dêh čar ta Nguyễn Phú Trọng pioh lăi jơlan gah pơđĭ glông dong tơlơi rô nao rai gum hrŏm abih bang akô̆ tlôn Việt Nam hăng Khač.

Khua git gai Ping gah dêh čar ta Nguyễn Phú Trọng hăng Khua git gai Ping gah, Khua mir sir dêh čar Khač Tập Cận Bình ăt hmâo mơn mông bơră ruăi, kiăng ngă dơlăm hloh tơlơi rô nao rai drơi pô jê̆ giăm nao rai kơplăh wah dua gơñu. Dua gơñu hmâo lăng hăng hmư̆ tơlơi lăi pơthâo 36 mơta hră pơ-ar pơkôl gum hrŏm amăng lu bruă hmâo kĭ pơkôl kơplah wah hơdôm Jơnum min, Ding jum, tơring čar, ƀôn prong dua bôh dêh čar./.