Mơguah lơ 1/12, Khua git gai Ping gah dêh čar ơi Tô Lâm hrŏm hăng bơnai ñu laih dong ƀing khua mua pơprong dêh čar nao truh laih pơ plơi prong jưh jom Vientiane, pơphun hơdôm bruă mă amăng jơlan hơdră nao čuă gưl kơnuk kơna pơ dêh čar Lao, nao ngă lơphet hơdor glăi 50 thun hrơi akŏ pơjing kơnuk kơna dêh čar Lao hăng git gai mông pơbưp khua mua pơprong kơplah wah Ping gah Cộng sản Việt Nam hăng Ping gah mơnuih ƀôn sang ngă hơkrŭ Lao. Mông čơkă sit nik Khua git gai Ping gah dêh čar ơi Tô Lâm hrŏm hăng bơnai ñu laih dong khua mua pơprong dêh čar ta hơmâo pơphun yôm phăn ƀơi Ƀirô Khua mir sir tui hơdră prong hloh brơi sa čô khua apăn akŏ dêh čar.

Khua git gai Ping gah, Khua mir sir dêh čar Lao ơi Thongloun Sisoulith git gai mông čơkă. Tal hyu mă bruă mơng Khua git gai Ping gah ơi Tô Lâm jing tơlơi hơđŏm glăi yôm phăn mơng rĭm boh dêh čar samơ̆ pơƀuh hơdôm yak nao prong tui amăng tơlơi rô nao rai Việt Nam-Lao, hơmâo găn rơgao lu tơlơi lông amăng rơnuk blah wang, găn rơgao lu tơlơi blah wang truh pơ hơdôm tơlơi tơnap tap amăng bruă pơjing, wai pơgang, pơđĭ kyar lŏn ia mơng dua boh dêh čar, dong mơng anun pơjing rai tơlơi rô nao rai hiam klă, jê̆ giăm, ƀiă đôč ƀuh tơlơi rô nao rai tui anai amăng jar kmar. Tal hyu mă bruă anai mơng Khua git gai Ping gah dêh čar ơi Tô Lâm pơsit tong tơlơi gir run mơng dua Ping gah, dua kơnuk kơna amăng bruă tŏ tui djă pioh, hơbôr đĭ dong hăng pơđĭ kyar tơlơi rô nao rai hiam klă yua tơlơi rơnuk rơnua, hơđong hăng pơđĭ kyar kjăp phik mơng rĭm boh dêh čar hăng amăng kual.