Amăng mông bưp Khua mir sir dêh čar Bulgaria, Khua git gai Ping gah, Khua mir sir dêh čar ta ơi Tô Lâm pơtŏng sit Việt Nam lăng yôm na nao hăng čang rơmang kơtưn đĭ hloh dong tơlơi rô nao rai gum hrŏm lu mơta hăng Bulgaria; pơtŏng sit Việt Nam pơpŭ na nao hăng čih hơdor pioh tơlơi gum djru mơ̆ng mơnuih ƀôn sang Bulgaria pioh kơ Việt Nam amăng bruă gơgrong pơtlaih rơngai hlâo adih hăng pơdŏng lŏn ia ră anai.

Bưp Khua mir sir dêh čar Phần Lan Alexander Stubb, Khua git gai Ping gah, Khua mir sir dêh čar ta ơi Tô Lâm bơni kơ Gong gai dêh čar hăng mơnuih ƀôn sang dêh čar Phần Lan hmâo djru laih Việt Nam amăng rơwang tơnap tap hlâo adih hăng amăng ƀrư̆ pơđĭ kyar, ăt kah hăng hmâo mơ-ĭt tơlơi tơña bla, pơsur mơnuih ƀôn sang Việt Nam pơsir tơlơi răm rai yua kơ kơthel tal 3 ngă rơgao. Amăng mông bưp Tơdăm phu Kuwait, Sheikh Sabah Al-Khaled Al-Sabah, Khua git gai Ping gah, Khua mir sir dêh čar ta ơi Tô Lâm rơkâo dua bơnah bơkơtuai nao rai grŭp gưl dlông hăng hơdôm gưl, pok pơhai ba glăi bôh tơhnal hơdôm hơdră pơkă gum hrŏm. Việt Nam amra čơkă hơdôm bôh anom bơwih ƀong Kuwait kơtưn tuh pơplai ƀơi Việt Nam./.