Khua git gai Ping gah, Khua mir sir dêh čar ta ơi Tô Lâm pơdah pran jua djơ̆ pran jua biă ƀơi anăp hơdôm tơlơi pơđĭ kyar klă hiăm kơplah wah dua bôh dêh čar; pơtŏng sit Việt Nam na nao lăng yôm tơlơi rô nao rai gum hrŏm hơbit, giăng mah phara kơplah wah dua ping gah, dua bôh dêh čar hăng mơnuih ƀôn sang dua bôh dêh čar. Khua git gai Ping gah, Khua mir sir dêh čar ta ơi Tô Lâm bơni kơ tơlơi jak iâo nao čuă gưl Kơnuk kơna pơ̆ dêh čar Cuba mơ̆ng Khua git gai Ping gah tal sa, Khua mir sir ơi Miguel Diaz-Canel, pơdah pran jua čang rơmang tal nao čuă amra hơkrŭ tơlơi đăo kơnang, hruă kơjăp hloh pran jua gum hrŏm hơbit hruă kơjăp kơplah wah djuai ania; pơđĭ dlông bôh tơhnal gum hrŏm, ngă brơi tơlơi rô nao rai Việt Nam hăng Cuba jing sa rơwang phrâo, pơđi kyar sit nik hăng kơjăp.

Khua anih jưh pơ ala Orlando Nicolas Hernandez Guillen pơdah pran jua ol kơdol dưi bưp glăi Khua git gai Ping gah, Khua mir sir dêh čar ta ơi Tô Lâm hlâo kơ tal nao čuă hmâo tơhnal kiăng lăi nao gru grua kơplah wah dua bôh dêh čar; pơtŏng sit Ping gah, Kơnuk kơna hăng Mơnuih ƀôn sang Cuba lăng tui na nao hăng pơsit yôm bôh than mơ̆ng giăm truh 40 thun pơplih phrâo gah yŭ tơlơi git gai mơ̆ng Ping gah Cộng sản Việt Nam apăn akô̆ lĕ Khua git gai Ping gah, Khua mir sir dêh čar ta ơi Tô Lâm./.