Khua git gai Ping gah, Khua mir sir dêh čar ta ơi Tô Lâm nao tơña bla, pơsur pran jua, brơi gơnam tam kơ neh wa mơnuih ƀôn sang glăk bĕ kơthel ƀơi Sang jơnum plơi pla Phú Thọ 1, să Trường Sinh, tơring glông Sơn Dương, tơring čar Tuyên Quang. Khua git gai Ping gah, Khua mir sir dêh čar ta ơi Tô Lâm čang rơmang neh wa ƀơi anai djru nao rai tơdruă hơđong tơlơi hơdip mơda dong. Kiăo tui anun, Khua git gai Ping gah, Khua mir sir dêh čar ta ơi Tô Lâm hmâo ƀơi anăp nao pel ĕp bruă pơgang pơgăn ia ling dăo bruă bư̆ bơnư̆, pơkra kơjăp akô̆ kli, hyu tơña bla, pơsur pran jua hơdôm khul mơnuih gum hrŏm pơkra kơjăp akô̆ hli kual găn ia krông Lô amăng tơring glông Sơn Dương.

Git gai mông mă bruă hăng Khua tơring čar Tuyên Quang kơ bruă pơgang pơgăn kơthel ia ling dăo ngă ƀơi tơring čar, Khua git gai Ping gah, Khua mir sir dêh čar ta ơi Tô Lâm rơkâo pel ĕp na nao, pơsir mơtăm hơdôm tơlơi amra truh hăng hơdôm bôh akô̆ kli, kueng hnoh, dơnao bơnư̆, đing hnoh pơđoh ia; hmâo kơčăo bruă kah pha jơlan ia rô amăng hơdôm tơlơi kiăng ječ pioh gơgrong hlâo ba đuăi mơnuih ƀôn sang; pok pơhai tañ hloh hơdôm bruă pơtlaih mơnuih, djru gơnam ƀong huă. Mơmot lơ 12/9, ƀơi plơi prong Việt Trì, Khua git gai Ping gah, Khua mir sir dêh čar ta ơi Tô Lâm hmâo mă bruă laih hăng khua tơring čar Phú Thọ hăng hmư̆ hơdôm tơlơi ba tơbiă, rơkâo đĭ mơ̆ng tơring čar amăng pơsir răm rai yua kơthel, ia ling dăo ngă./.