Tơlơi lăi pơthâo mơ̆ng Ding jum pơtom hiăp dêh čar Việt Nam brơi thâo mơ̆ng lơ 21 truh lơ 27/9/2024, Khua git gai Ping gah, Khua mir sir dêh čar ta ơi Tô Lâm hăng bơnai ñu hrŏm hăng grŭp khua pơ ala gưl dlông Việt Nam amra nao pơhmư̆ mông Jơnum prong Pơgi kơdih anai, Khul khua pơ ala Sang gum hrŏm djop dêh čar tal 79, mă bruă ƀơi dêh čar Mi.

Kiăo tui anun, Khua git gai Ping gah, Khua mir sir dêh čar ta ơi Tô Lâm čuă gưl Kơnuk kơna pơ̆ dêh čar Cuba tui tơlơi jak iâo mơ̆ng Khua git gai Ping gah tal sa Grŭp mă bruă Ping gah Cộng sản dêh čar Cuba, Khua mir sir dêh čar Cuba Miguel Diaz Canel Bermudez. Tui hăng pô truh pơhiăp Ding jum pơtom hiăp dêh čar Việt Nam Phạm Thu Hằng, pơkă hlâo Khua git gai Ping gah, Khua mir sir dêh čar ta ơi Tô Lâm amra hmâo tơlơi pơhiăp yôm phăn amăng mông Jơnum prong Pơgi kơdih anai, ƀơi Khul khua pơ ala Sang gum hơbit djop dêh čar tal 79 hăng hmâo hơdôm bruă pơbưp dua bơnah nao pơhmư̆ hơdôm tơlơi jơnum amăng rơwang tal mă bruă ƀơi New York, dêh čar Mi./.