Lơ 14/5, ƀơi Sang bruă Ping gah, Khul pơčrâo bruă jơnum pơƀut glăi 100 thun Ping gah git gai bruă ngă hơkrŭ Việt Nam, jơlan hơdră git gai lŏn ia kiăng đĭ kyar amăng 100 thun pơ anăp dong laih anun jơnum pơƀut glăi 40 thun ngă tui Hră pơčrâo brơi akŏ pơdong lŏn ia amăng rơnuk phrâo tui jơlan chủ nghĩa xã hội jing jơlan lăng ba tơlơi hơdip mơnuih ƀôn sang yơh phun, pơphun jơnum lok sa.

Git gai mông jơnum, Khua git gai Ping gah, Khua mir sir ơi Tô Lâm lăi dlăm, pơƀut glăi 100 thun Ping gah git gai, 40 thun ngă tui Hră pơčrâo brơi akŏ pơdong lŏn ia khŏm kiăo tui gru phun dlăm, tơlơi pơtô djơ̆ laih anun pok pơhư jơlan či đĭ kyar lŏn ia pơ anăp. Khua git gai Ping gah, Khua mir sir lăi rơđah, pran jua lĕ khŏm ngă rơđah hơbô̆ bruă đĭ kyar mơ̆ng Việt Nam, hơbô̆ bruă chủ nghĩa xã hội hăng jơlan yak nao chủ nghĩa xã hội mơ̆ng Việt Nam hrŏm hăng hơdôm tơlơi rô nao rai khŏm hơmâo ƀơ̆i yơh amăng thun blan akŏ pơdong chủ nghĩa xã hội; čih pơkra tơlơi găl, tơlơi pơtô djơ̆ ngă atur či čih pơkra Hră pơčrâo brơi jơlan đĭ kyar lŏn ia hăng pơgang lŏn ia amăng rơnuk phrâo - rơnuk hrưn đĭ mơ̆ng djuai ania ta. Khua git gai Ping gah, Khua mir sir ơi Tô Lâm lăi dlăm 3 tơlơi kiăng kơ hơdră tum pơƀut glăi, amăng anun khŏm pơƀut djơ̆ hrŏm tơlơi pơtô djơ̆ hăng tơlơi sit nik; ba tơbiă jơlan đĭ kyar pơ anăp adih khŏm kiăo tui phun tơhnal boh thâo ia rơgơi, đao lăng hlâo jơlan đĭ kyar laih anun tơlơi kiăng đĭ kyar lŏn ia.