Amăng hră mơ-it, Khua git gai ping gah dêh car mơ-it nao ƀing čơđai Việt Nam amăng lŏn ia hăng pơ tač rơngiao, ƀing čơđai dêh čar tač rơngiao dŏ hơdip ƀơi Việt Nam bă blai pran khăp pap amăng bơyan blan bơrơmi anai, tết kơ ƀing čơđai. Hăng čang rơmang rĭm bơyan blan bơrơmi amra kơđŏm glăi tơlơi hiam klă kơ ƀing čơđai, Khua git gai Ping gah ăt pap mơñai hăng hơdôm tơlơi tơnap tap kơ ƀing čơđai kual ia ling dăo: “Bơyan blan bơrơmi thun anai ăt ƀu pơhlôm lơi yua hơjan kơthel ba glăi lu tơlơi truh sat kơ lu sang anŏ, plơi pla, phường să, lu čơđai djai, lu čơđai rơngiă amĭ ama, ƀu hơmâo sang dŏ, glăk dŏ hơdip tơnap tap hloh. Khua git gai Ping gah ăt hning rơngô̆t hrŏm hăng hơdôm boh sang anŏ ƀing čơđai bưp tơlơi truh sat yua hơjan kơthel hăng čang rơmang abih bang ƀing ta amra gir run găn rơgao tơnap tap. Hăng ƀing čơđai kual bơdjơ̆ nao hơjan kơthel, wa pơtă pơtă ƀing čơđai pơhlôm rơnuk rơnua lơm nao sang hră, hyu ngui. Bĕ hĭ hơdôm anih hŭi rơhyưt, anăm ngui giăm ia krông čroh hnoh, hmư̆ hiăp amĭ ama, nai pơtô kiăng pơhlôm rơnuk rơnua kơ ta pô hăng gơyut gơyâo”.