Mơguah lơ 26/9, tui mông dêh čar ta, Khua git gai ping gah, khua mir sir ơi Tô Lâm hăng bơnai ñu hrŏm hăng grup khua mua kơnuk kơna dêh čar ta nao truh laih pơ tơdron rơdêh por jar kmar Jose Martin ƀơi plơi prong jưh jom Lahabana, pơphun nao čuă sit nik gưl kơnuk kơna dêh čar Cuba tui hăng tơlơi jak iâu mơ̆ng Khua git gai ping gah, khua mir sir dêh čar Cuba ơi Miguel Diaz Canel Bermudez hăng bơnai ñu. Tal nao čuă dưi pơphun lơ̆m dua boh dêh čar anăp nao či hơdor glăi 65 thun hrơi akŏ pơjing bruă ngă giăng mah pơtom hiăp lơ 2/12/1960-lơ 2/12/2025, tal nao čuă jơmư anai jing sa kơnôl brơi ƀuh, pơtong rơđah bruă ngă giăng mah pŭ ƀăn gum pơgôp mơ̆ng gru grua yôm phara biă mă Việt Nam-Cuba laih anun ăt lăng kah hăng kông ngăn yôm pơphăn mơ̆ Ping gah, kơnuk kơna hăng mơnuih ƀôn sang dua boh dêh čar abih pran jua pơbŭ đĭ, laih dơ̆ng pơdah pran jua lăng yôm mơ̆ng Việt Nam pơpŭ kơ Cuba laih anun anih dêh čar Cuba amăng hơdôm hră čih anăn dêh čar pơtom hiăp mơ̆ng Việt Nam.

Him lăng amăng tal nao čuă anai, Khua git gai ping gah, khua mir sir ơi Tô Lâm nao jơnum hrŏm ngă yang čơkă jum prong biă mă laih anun mut bơkơtuai nao rai, bưp ƀing khua mua pơprong amăng kơnuk kơna dêh čar Cuba; nao dưm guang bơnga ƀơi gong kut klao rup truh Khua mir sir Hồ Chí Minh hăng mơnuih khin hơtai hing ang djuai ania Cuba ơi Jose Marti, hyu čuă jơmư  hơdôm anih anom bơwih ƀong huă, amăng anun hơmâo lu sang bruă kơčăo bruă ngă hrŏm tuh pơ alin hăng sĭ mơdrô mơ̆ng Việt Nam, bưp bơ ră ruai tom gơyut gơyâo giăng mah hăng ƀing hlăk ai dua bơnah dêh čar.