Tŭ ư hăng tơlơi jak iâu mơng ơi pơtao dêh čar Đan Mạch Frederik X hăng bơnai ñu, Khua khul pơ ala kual Mi kô̆ Antonio Costa hăng Khua dêh čar Bỉ Bart De Wever, mơguah anai (19/10), Khua git gai Ping gah, Khua mir sir ơi Tô Lâm hrŏm hăng bơnai ñu laih dong ƀing khua mua pơprong dêh čar Việt  Nam nao čuă dêh čar Đan Mạch, nao čuă sit nik Khul pơlir hơbit kual Mi kô̆ (EU) hăng dêh čar Bỉ dong mơng kơnôl 19-24/10 thun 2026. Tal nao čuă gưl Kơnuk kơna pơ dêh čar Đan Mạch mơng Khua git gai Ping gah, Khua mir sir ơi Tô Lâm lĕ tơlơi kơđŏm glăi yôm phăn amăng tơlơi rô nao rai dua bơnah, pơdah tơlơi yak nao yôm phăn, gơgrong bruă kơđi čar hăng pran đăo gơnang kơplah khua mua dua bơnah, laih dong ngă pơtrut phrâo ba tơlơi rô nao rai Việt Nam-Đan Mạch hrưn đĭ prong ƀiă.

Hăng khul EU, tal nao čuă anai lĕ hrơi mông kiăng dua bơnah ngă dơlăm ƀiă dong hơdôm bruă ngă hrŏm yôm phăn, sit biă ñu sĭ mơdrô, tuh pơ alin, boh thâo ia rơgơi, pơtô mơnuih mă bruă, mơng anun pơjing tơlơi rô nao rai Việt nam-EU jing gru phun amăng ngă hrŏm kual ASEAN-EU. Hăng dêh čar Bỉ, tal nao čuă anai kiăng dua bơnah hơmâo tơlơi yak nao yôm amăng ngă hrŏm hơdôm bruă mơ̆ dêh čar Bỉ hơmâo tơlơi dưi hăng Việt Nam glăk đing nao ngă anun lĕ boh thâo ia rơgơi, čip pơkĕ nao rai măi mok, apui lơtrik pơkra glăi, ngă hmua mơtah hăng pơplih pơčeh phrâo, logistics hăng tơdrun kompăn rơgơi.