Khua git gai ping gah, khua mir sir ơi Tô Lâm lăi pơtong, mông jơnum hơdor glăi anai djơ̆ mông abih bang amăng ping gah, mơnuih ƀôn sang, ling tơhan hơdor glăi, bơni prong kơ pran jua mă bruă mơ̆ng ơi Hà Huy Tập hăng bruă hơkrŭ lŏn ia, laih dơ̆ng râo pơdưh pran jua tơlơi pơ-ư ang, kiăng hrưn đĭ hăng gơgrong ba ƀơi anăp Lŏn ia.

Tơlơi hơdip ngă hơkrŭ mơ̆ng ơi Hà Huy Tập đưm adih, jing sa gru bơngač hiam mơ̆ng ƀing mơnuih rơgơi kơhnâo, hơmâo pran jua thâo khăp kơ lŏn ia, tañ thâo hluh ngă hơkrŭ, kiăo tui kru khua apăn akŏ Nguyễn Ái Quốc. Ñu hơmâo tơlơi pơmin tong ten, kơjăp pran jua, khin hơtai mơ̆ng sa čô mơnuih ping gah, pơyơr pran jua kơ bruă hơkrŭ mơ̆ng ping gah hăng djuai ania. Mah amăng rơnuk blah wang ayăt kơtư̆ juă, ngă sat, tơl ba pơdjai, ñu ăt sa pran jua tong ten hăng ping gah hăng mơnuih ƀôn sang. Tui hăng Khua git gai ping gah, khua mir sir, amăng rơnuk phrâo, pran jua anun khom jing tơlơi pơtô djơ̆, tơpă, bruă mă hiam kơ rim čô mơnuih ping gah, mơnuih mă bruă kơnuk kơna, khin pơmin, khin ngă kiăng pơblih phrâo, pơgang ba anŏ tŭ yua hrŏm, lăng kơ boh tơhnal dưi ngă jing gai pơkă lăp pran jua, tơlơi mơak hlak kơ mơnuih ƀôn sang sa tơlơi pơkă prong hloh.