Hok mơak hơmâo bưp ƀing čơđai rơgơi mơbruă, Khua git gai Ping gah, Khua mir sir ơi Tô Lâm lăi glăi sui mơ̆ng anai 85 thun, amăng tơlơi glêh tơnap bruă ngă hơkrŭ, Khul tơdăm ngek dra muai kơsung nao hlâo Hồ Chí Minh hơmâo akŏ pơdong, laih anun jing sang khăp ƀu-eng biă mơ̆ng ƀing čơđai Việt Nam, lu mơnuih rơgơi kơhnâo amăng rơnuk blah wang kah hăng Kim Đồng, Lê Văn Tám, Kpă Kơlơng laih anun lu tơdăm ngek dra muai sông kơtang pơkŏn dong ngă jă bơngač pran jua “thun aset samơ̆ pran kơtang”.

Khua git gai Ping gah, Khua mir sir ơi Tô Lâm lăi pơtŏng 5 tơlơi Wa Hồ pơtô anun lĕ anŏ yom dlăm biă kiăng ƀing čơđai hrăm, pơtŏp rơguăt laih anun prong tui. Lăi nao hơdôm bruă amăng thun 2045, ngă lơphet 100 thun akŏ pơdong lŏn ia, Việt Nam jing dêh čar đĭ kyar hơmâo prăk lu, Khua git gai Ping gah, Khua mir sir lăi, lu ƀing čơđai amăng rơnuk anai jing hnưr thun gum pơgôp klă hloh, djru akŏ pơjing, pơgang ba hăng ngă brơi lŏn ia ta hmư̆ ư djŏp dêh.