Ƀrô djơ̆ tal pok phun Tal jơnum lok 4, Khua pơ ala mơnuih ƀôn sang dêh čar ta tal 15 hăng hơdor glăi 92 thun Hrơi pơdŏng Khul pơlir hơbit đah kơmơi Việt Nam, čơtlăm lơ 20/10, ƀơi Anih mă bruă Khua mir sir, Khua mir sir dêh čar ta ơi Nguyễn Xuân Phúc bưp ƀô̆ mơta adơi amai ngă khua pơ ala lĕ ƀing adơi amai git gai, Khua git gai hơđăp Ping gah, Kơnuk kơna hăng ƀing đah kơmơi ding kơna Ping gah dêh čar tal 13, ƀing đah kơmơi ngă khua pơ ala gah Ƀirô Khua pơ ala mơnuih ƀôn sang dêh čar ta tal 15. Nao pơhmư̆ mông bưp ƀô̆ mơta hmâo Khua dêh čar ơi Phạm Minh Chính, Khua git gai wai lăng pơ ala mơnuih ƀôn sang dêh čar ơi Vương Đình Huệ, Khua hơđăp git gai wai lăng pơ ala mơnuih ƀôn sang dêh čar ta yă Nguyễn Thị Kim Ngân.

Khua mir sir dêh čar lăi rơđah, Ping gah hăng Kơnuk kơna lăng yôm biă tơlơi pơlar mơnuih mă bruă amăng đah kơmơi gah bruă kơđi čar mơng dêh čar truh plơi pla, Hră pơ-ar jơnum, tơlơi pơtrun pơsit mơng Ping gah leng kơ lăi nao rơđah truh tơlơi anai. Rơgao rim rơwang bruă Khua pơ ala mơnuih ƀôn sang, ƀing đah kơmơi ngă khua pơ ala pơdah pran gơgrong, bôh thâo, ia rơgơi, bruă mă mơng ƀing adơi amai mơbruă, khua pơ ala mơnuih ƀôn sang. Khua mir sir dêh čar rơkâo, gưl ping gah, gong gai plơi pla, hơdôm ding jum, gơnong bruă đing nao kơjăp, sit nik, ba glăi bôh tơhnal bruă pok pơhai ngă tui hơdôm tơlơi pơkă kơ bruă mă mơng đah kơmơi, ngă tui hloh dong bruă mă mơng đah kơmơi apăn bruă amăng bruă bơwih ƀong – bruă kơđi čar, mơnuih mơnam, biă ñu lĕ bruă mă mơng ƀing đah kơmơi ngă Khua pơ ala mơnuih ƀôn sang./.