Amăng anun, Hơdrôm hră čih lăi pơthâo bruă kơđi čar pơ alin abih bang mơ̆ng 3 pok hră lăi pơthâo ( Hră lăi pơthâo kơđi čar, Hră lăi pơthâo bơwih ƀong huă-mơnuih mơnam hăng Hră lăi pơthâo pơƀut bruă mă akŏ pơdong ping gah) pơjing rai sa dơnuai mă bruă lir hơbit, pơhlom akŏ klôn, pơthâo rơđah bruă phun, yom, djop djel ber man ƀrô, amuñ thâo hluh, amuñ hơdor pioh, amuñ pok pơhai ngă tui. Jơlan hơdră či ngă tui Hră pơtrun mơ̆ng Jơnum ruah khua tal XIV mơ̆ng ping gah dêh čar pơčrâo rơđah “pô ngă, jơlan hơdră či ngă, mơnuih ngă bruă, tơhnal pơkă anăp nao” pioh pok pơhai ngă tui.

Khua git gai ping gah ơi Tô Lâm lăi rơđah: Anŏ gêh găl, pran jua hơmâo, kơnuih hing ang, tơlơi đăo kơnang ƀơi jar kmar mơ̆ng lŏn ia ta dưi hơmâo kah hăng ră anai lĕ yua thâo pơtum pơƀut glăi, djă pioh gru grua hiam mơ̆ng hơdôm rơbâo thun akŏ pơdong hăng pơgang lŏn ia; jing boh tơhnal mơ̆ng 96 thun akŏ pơdong hăng pơgang lŏn ia phrâo rơngai gah yŭ kơ tơlơi git gai mơ̆ng Ping gah; jing boh tơhnal mơ̆ng 40 thun pơblih phrâo; jing tơlơi tuh rơyuh pran jua, wor rơbit drơi jăn pô mơ̆ng hơdôm rơnuk ling tơhan ngă hơkrŭ, khin hơtai blah ngă, tuh drah pơčah asar.

Kơ boh tơhnal pơđĭ kyar lŏn ia mơ̆ng thun 2026-2030 hăng lăng nao pơ anăp adih truh thun 2045 lĕ, Khua git gai ping gah brơi thâo, djă hnơ̆ng anih hơdip  jum dar, lŏn ia rơnuk rơnua, hơđong; pơđĭ kyar hmar, kơjăp hơđong kơ lŏn ia; pơblih phrâo hăng pơđĭ tui hlom bom tơlơi hơdip mơda mơnuih ƀôn sang; ngă pô git gai bruă mă yom, hrưn đĭ pô, h’ĭn pran jua, anăp nao amăng rơnuk pơblih phrâo mơ̆ng djuai ania. Gir run kiăng dưi ngă djơ̆ tơhnal pơkă rơnoh pơđĭ kyar GDP mơ̆ng 10% sa thun pơngŏ; rơnoh pơhrui glăi pơkă dưm dưm rim čô mơnuih sa thun truh thun 2030 kiăng hơmâo 8.500 USD.

Kiăng dưi ngă djơ̆ tơhnal pơkă hơdôm anun, Hră lăi pơthâo bruă kơđi čar hơmâo pơtong rơđah 12 mơta bruă mă prong či ngă; 6 mơta bruă mă gơgrong ba phun hăng 3 mơta bruă khom pơblih kơtang hloh. Khua git gai ping gah lăi, yak nao amăng rơwang bruă jơnum ruah khua ping gah tal XIV, bruă kiăng ngă lĕ khom ngă kơtang, ngă hmar hăng abih bang ling tơhan sa pran jua, djă kơjăp tơlơi đăo kơnang, pơđĭ tui tơlơi gơgrong ba, glăm ba amăng bruă, pơdah thâo tơlơi pơmin ia rơgơi, pơhluh brơi jơlan kiăng hruaih tơgŭ ngă bruă kiăo tui anŏ kiăng; ngă hiư̆m pă rim thun, rim blan, rim hrơi, tơdơi kơ tal jơnum anai hơmâo ba glăi boh tơhnal tŭ yua sit nik, rơđah rơđong, hơmâo anŏ pơblih sit nik; kiăng mơnuih ƀôn sang ƀuh, mơnuih ƀôn sang đăo kơnang, mơnuih ƀôn sang dong yua, mơnuih ƀôn sang ngă hrŏm hăng mơnuih ƀôn sang pô mă yua.