Lơ 18/11, ƀơi Ƀirô mă bruă Ping gah dêh čar ta, Grŭp črâo ba bruă pơgang, pơgăn hưp ƀong kông ngăn, tơlơi ngă soh dêh čar ta pơphun Bruă jơnum gah yŭt tơlơi git gai mơng Khua git gai Ping gah dêh čar ta, Khua Grŭp črâo ba kiăng bơkơtuai, gum pơhiăp kơ bôh tơhnal črâo ba pơsir pioh kơ sa dua mơta kơđi tơlơi gah Grŭp črâo ba lăng tui, črâo ba mơng gah tlôn Mông jơnum tal 12 truh ră anai. Klah čun bruă jơnum hrom hăng bruă bơni pơsit yôm hơdôm bôh tơhnal ƀuh rơđah hloh amăng bruă pơgang pơgăn hưp ƀong kông ngăn, tơlơi ngă soh amăng hơdôm hrơi rơgao, Khua git gai Ping gah dêh čar ơi Nguyễn Phú Trọng ăt črâo rơđah mơn, bruă pơgang pơgăn hưp ƀong kông ngăn tơlơi ngă soh ăt dô̆ mơn sa dua mơta tơlơi akă dưi pơsir, akă dưi ngă kah hăng: Sa dua mơta kơđi tơlơi kual pơđut pơsir tui kơčăo bruă mơng Grŭp črâo ba.

Khua git gai Ping gah dêh čar ơi Nguyễn Phú Trọng lăi rơđah tơlơi pơmin: Amăng bruă kơdŏng pơgang hưp ƀong kông ngăn tơlơi ngă soh khom ngă tui khut khăt hăng ha amăng plĕ, khom ha amăng plĕ kơplah wah pơdŏng hăng kơdŏng, kơplah wah pơdŏng ngă giong hơdră pơkă kiăng pơgăn sir hơdôm anô̆ akă sir, ƀu kơjăp hăng bruă ngă tui hơdôm jơlan gah pơgang hlôm hlâo hưp ƀong kông ngăn; kơplah wah kơtưn pel ĕp, lăng tui, pel ĕp, prăk kak kiăng thâo tañ tơlơi hưp ƀong kông ngăn tơlơi ngă soh hăng pel ĕp, hyu hơduah ĕp kơđi, pơsir kơđi phăt kơđi./.