Tal rai čuă gưl kơnuk kơna pơ Việt Nam mơ̆ng Khua git gai Ping gah, Khua mir sir Khač Tập Cận Bình hrŏm hăng Bơnai ñu laih anun grup khua prong mơ̆ng Ping gah, Kơnuk kơna dêh čar Khač hơmâo pok tơbiă lu tơlơi gêh gal phrâo kơ dua bơnah. Anun lĕ čang rơmang tơlơi kơdrưh kơ-ang, hmư̆ hing phrâo mơ̆ng tơlơi rô nao rai dua bơnah Việt Nam - Khač. Ƀơi mông jơnum, dua bơnah bơkơtuai kơ bruă pơđĭ tui tơlơi kơdrưh kơ-ang hmư̆ hing phrâo kơ tơlơi rô nao rai dua bơnah, pơtrut ngă hrŏm abih bang mơ̆ng dua bơnah jai hrơi dlăm hăng sit nik hloh.

Amăng 20 thun laih rơgao, dêh čar Khač jing dêh čar sĭ mơdrô prong hloh mơ̆ng Việt Nam laih anun ră anai Việt Nam jing dêh čar bơwih ƀong sĭ mơdrô prong hloh mơ̆ng dêh čar Khač amăng ASEAN, dêh čar ngă gŏp sĭ mơdrô prong tal 4 mơ̆ng dêh čar Khač ƀơi rŏng lŏn tơnah (tơdơi kơ Mi, Japan, Hàn Quốc). Prăk sĭ mơdrô dua bơnah đĭ 9 wơ̆t mơ̆ng rơnoh 20 klai dolar thun 2008 đĭ giăm 180 klai dolar amăng thun 2022. Rơgao 15 thun, tuh pơ alin mơng dêh čar Khač pơ Việt Nam đĭ rơbêh 10 wơ̆t mơ̆ng 2 klai dolar Mi amăng thun 2008 jing 25 klai dolar Mi ră anai. Tơlơi bang bơngač amăng tơlơi rô nao rai Việt Nam - Khač dong lĕ pơbưp mơnuih ƀôn sang hăng ngă hrŏm hơdôm boh tơring čar ƀôn prong. Truh ră anai, hơmâo laih giăm 60 boh tơring čar ƀôn prong mơ̆ng Việt Nam ngă hrŏm hăng hơdôm boh tơring čar ƀôn prong dêh čar Khač. Amăng 10 blan thun anai, Việt Nam hơmâo čơkă 1,3 klăk wơ̆t čô tuai dêh čar Khač. Tơlơi ngă hrŏm kơplah wah Việt Nam - Khač amăng bruă hrŏm hơmâo amăng kual hăng jar kmar jai hrơi pơđĭ tui.