Tơdơi kơ 3 mông đĭ amăng rơdêh por, lơm 1 mông 20 čơtlăm lơ 30/10, rơdêh por pơgiăng Khua git gai Ping gah dêh car ta ơi Nguyễn Phú Trọng hăng Grŭp khua pơ ala gưl dlông Việt Nam hmâo plĕ trun laih ƀơi tơdron rơdêh por jar kơmar Bắc Kinh, pơphun tal nao čuă dêh čar Khač tui tơlơi jak iâu mơng Khua git gai Ping gah, Khua mir sir dêh čar Khač ơi Tập Cận Bình.

Khua git gai Ping gah Nguyễn Phú Trọng hăng ơi Lưu Kiến Siêu (gah iao) ƀơi tơdron rơdêh por

Tal nao čuă anai mơng ơi Nguyễn Phú Trọng pơphun tơdơi kơ Jơnum khua pơ ala đơ đam dêh čar tal 20 Ping gah dêh čar Khač pơđut truh kih, grŭp git gai phrâo hmâo lăi pơthâo laih hăng ơi Tập Cận Bình dưi ruah ngă glăi Khua git gai Ping gah rơwang bruă tal 3. Khua git gai Ping gah dêh čar ta ơi Nguyễn Phú Trọng jing khua git gai dêh čar mơng dêh car tač rơngiao blung a nao čuă dêh čar Khač brơi ƀuh tơhnal yôm phăn mơng tơlơi rô nao rai kơplah wah Khač hăng Việt Nam ăt kah hăng kơplah wah Ping gah dêh čar Khač hăng Ping gah dêh čar Việt Nam.

Khăn gru Việt Nam hmâo por đĭ ƀơi Tơdron lak Thiên An Môn hrom hăng Khăn gru Khač čơkă tal nao čuă

Pơtŏng sit hơdră pơtrun ha sa mơng Việt Nam lăng tơlơi rô nao rai hăng Khač jing đing nao hlâo amăng hơdră bruă pơtom hiăp. Čang rơmang pơđĭ kyar sui thun, hơđong, jai hrơi ba glăi bôh tơhnal. Hrơi anai, lơ 31/10, ngă lơphet čơkă Khua git gai Ping gah Nguyễn Phú Trọng dưi pơphun yôm phăn ƀơi anih Jơnum mơnuih ƀôn sang Bắc Kinh yua kơ Khua git gai Ping gah dêh čar, Khua mir sir dêh čar Khač ơi Tập Cận Bình git gai. Tơdơi kơ mông ngă lơphĕt cơkă, Khua git gai Ping gah dua bôh dêh čar pơphun bơkơtuai gưl dlông hăng lăng mông ngă lơphĕt kĭ pơkôl lu hră pơ-ar yôm phăn./.