Khua dêh čar Kur, Hun Manet pơdah pran jua hok mơak lơ̆m ƀuh tơlơi ngă giăng mah plah wah dêh čar Kur hăng Việt Nam jai hrơi dưi kjăp tui hăng pơđĭ kyar amăng djop bruă. Hun Manet lăi pơthâo hăng Khua git gai ping gah dêh čar ta hơdôm tơlơi pơhing phun ƀơi dêh čar Kur phrâo anai, amăng anun bruă ngă kjăp tui khul apăn bruă amăng kơnuk kơna, mơnuih apăn bruă amăng sang bruă khua pơ ala mơnuih ƀôn sang dêh čar, kơnuk kơna dêh čar rơwang bruă phrâo hăng boh tơhnal plĕ hră ruah khua ping gah CPP ăt kah hăng boh tơhnal bơkơtuai nao rai hăng khua dêh čar Phạm Minh Chính.

Dua bơnah hơmâo pơčrong sai nao rai lu mơta tơlơi dua ping gah đing nao, ngă hrŏm bơwih ƀong huă, pơgang rơnuk rơnua hăng tơlơi rô nao rai dua bơnah ƀing hlăk ai. Khua git gai ping gah Nguyễn Phú Trọng lăi pơtong, klâo boh dêh čar Kur, Lao-Việt Nam lĕ gum pơgôp nao rai, djru tơdruă găn rơgao hơdôm tơlơi lông lăng tơnap tap, yua kơ anun, amăng črăn rơnuk phrâo, dua bơnah kiăng djă pioh, pơbŭ tui bruă ngă giăng mah Việt Nam-Kur jai hrơi pơđĭ kyar hloh.