Khua git gai ping gah ơi Nguyễn Phú Trọng bơni biă mă Khua pơ ala mơnuih ƀôn sang Cuba pơ ala brơi Ping gah, kơnuk kơna Cuba rai jơnum hơdor glăi tal anai, lăng yôm bruă mă ping gah, kơnuk kơna Cuba adơi ayong tong ten hăng tơlơi giăng mah yôm phara Việt Nam-Cuba. Ơi Nguyễn Phú Trọng lăi pơtong, Việt Nam lăng yôm, djă pioh hăng khut khăt ngă kjăp hloh tơlơi rô nao rai gum pơgôp hơmâo mơ̆ng đưm phara biă mă Việt Nam-Cuba laih anun tơlơi kiăng mơ̆ng Việt Nam khut khăt dong yua, gum pơgôp kjăp hăng Cuba, hơngah djop mơta tơlơi kom hăng iâu pơthưr lui mơtam jơlan hơdră guang dar kom Cuba.

Dua čô khua tŭ ư ngă kjăp tui atur tơlơi giăng mah bruă kơđi čar plah wah ping gah, ngă anăp pơčrâo jơlan pơđĭ kyar tui bruă giăng mah pŭ ƀăn kơ dua bơnah, rơkâo djop ding jum, anom bruă hăng djop tơring čar dua bơnah ăt ngă hrŏm tong ten hloh, pơphun bruă mă hơdeč hmar djơ̆ găl kiăng ngă gêh găl tui hăng hră pơkôl, pơsit anăp mă bruă phrâo pơtrut pơđĭ kyar bơwih ƀong huă, sĭ mơdrô, tuh pơ alin, djru amăng bruă ngă hmua, pơtô pơhrăm, kơsem min ia rơgơi tơlơi kơhnâo pơjeh djuai mơnong hơdip, bruă ia jrao....