VOV4.Jarai-Tlam lơ 29/9, ƀơi sang bruă ping gah dêh čar, ơi Nguyễn Phú Trọng Khua git gai ping gah dêh čar hơmâo tŭ jum ơi Manuel Marrero Cruz, ding kơna ding jum kơđi čar ping gah dêh čar Cuba, Khua dêh čar Cuba ƀrô rai čuă sit nik Việt Nam. Ƀơi mông bưp, ơi Nguyễn Phú Trọng lăi, Ping gah, Kơnuk kơna hăng mơnuih ƀôn sang Việt Nam lăng yôm hăng bơni biă mă tơlơi dong yua mơ̆ng Cuba amăng bruă pơklaih rơngai lŏn ia, djuai ania hăng man pơdong dêh čar Việt Nam.

Khua git gai ping gah đăo kơnang gah yŭ kơ tơlơi git gai mơ̆ng Ping gah Cuba hing ang, mơnuih ƀôn sang Cuba adơi ayong amra ngă tui truh kih hơdră bơih ƀong huă, mơnuih mơnam kiăo tui jơlan hơdră bơkơnar, ngă khua pô, pơdrong asah hơđong kjăp. Khua git gai ping gah ơi Nguyễn Phú Trọng rơkâo dua bơnah kơtưn ngă hrom hăng pok pơhai sa amăng plĕ bruă mă amăng klâo plang pơtom hiăp ping gah, pơtom hiăp kơnuk kơna hăng pơtom hiăp mơnuih ƀôn sang, ngă tui tŭ yua hơdôm tơlơi pơkôl pơkă djru nao rai tơdruă.

 Nay Jek: Pơblang