VOV4.Jarai-Tlam lơ 13/11, Khua git gai ping gah ơi Nguyễn Phú Trọng tŭ jum Khua dêh čar Đức ơi Olaf Scholz ƀrô rai čuă sit nik Việt Nam. Khua git gai ping gah ơi Nguyễn Phú Trọng lăng yôm boh tơhnal tŭ yua hiam klă bơkơtuai kơplah wah Khua dêh čar Đức hăng Khua dêh čar ta ơi Phạm Minh Chính, bơni kơ hơdôm pok hră tŭ ư ngă hrom djop ding jum, anom bruă hơmâo kĭ dua bơnah; lăi pơtong Việt Nam lăng bruă ngă giăng mah rô nao rai hăng Đức yôm phara.

Khua git gai ping gah bơ ră ruai hăng khua dêh čar Đức, hơdôm bruă či ngă pơ anăp, jơlan hơdră pơprong kiăng pơtrut ngă hrom pơđĭ kyar djop bruă mă, kiăng pơtrut tơlơi ngă giăng mah dua bơnah tŭ yua, hiam klă, ba tơlơi ngă giăng mah dua bơnah dêh čar pơđĭ kyar phrâo, lăp hăng tơlơi čang rơmang laih anun tơlơi gêh găl mơ̆ng dua bơnah. Bơni hơ-ơč kơ boh tơhnal gah Việt Nam hơmâo ngă pơđĭ kyar lŏn ia, Khua dêh čar Đức lăi pơtong, dêh čar Đức lăng yôm bruă ngă giăng mah rô nao rai yôm phara kơplah wah Đức-Việt Nam, ăt kah hăng lăng yôm tơlơi gơgrong ba, kơnuih ƀơi jar kmar mơ̆ng Việt Nam, amăng anun hơmâo tơlơi gơgrong mơ̆ng Việt Nam ƀơi kual ASEAN.