Ƀơi mông tŭ jum, Khua git gai ping gah ơi Nguyễn Phú Trọng bơni kơ ơi Lý Hiển Long hăng grup khua mua mơ̆ng kơnuk kơna Singapore rai čuă Việt Nam djơ̆ hrơi dua boh dêh čar hơdor glăi tal 50 thun akŏ pơjing bruă ngă giăng mah pơtom hiăp hăng 10 thun akŏ pơjing bruă ngă hrŏm kjăp hloh. Khua git gai ping gah pơdah pran jua hok mơak kơ bruă rô nao rai dua bơnah pơđĭ kyar, lăng yôm bruă mă kơtưn hloh tơlơi giăng mah gơyut gơyâo hăng Singapore jing dêh čar jĕ giăm hơmâo anih dŏ yôm amăng kual laih anun amăng jar kmar.

Khua dêh čar ơi Lý Hiển Long lăi pơthâo hăng Khua git gai ping gah kơ boh tơhnal bơkơtuai hăng Khua dêh čar ơi Phạm Minh Chính hăng khua mua kơnuk kơna Việt Nam; tŭ ư hăng tơlơi rơkâo mơ̆ng Khua git gai ping gah ơi Nguyễn Phú Trọng kơ bruă ngă hrŏm, lăng anun sa jơlan hơdră anăp nao bruă yôm ngă hrŏm dua bơnah pơ anăp adih.

Ăt amăng lơ 28/8 mơ̆n, ƀơi anom mir sir, ơi Võ Văn Thưởng, Khua mir sir hơmâo čơkă jum Khua dêh čar Singapore ơi Lý Hiển Long. Dua čô khua pơdah pran jua mơak ƀuh tơlơi pơđĭ kyar prong hloh hăng lu boh tơhnal tŭ mă hiam klă mơ̆ng bruă ngă giăng mah dua bơnah amăng 50 thun rơgao, biă mă ñu bruă ngă hrŏm bơwih ƀong huă, pơgang rơnuk rơnua, pơtô hrăm, pơtô pơjuăt.