Ƀơi mông tŭ jum, Khua git gai ping gah ơi Nguyễn Phú Trọng lăi pơtong: Ping gah, kơnuk kơna hăng mơnuih ƀôn sang Việt Nam čang rơmang pơtrut ngă giăng mah mơak klă hăng dêh čar Mông Cổ lĕ jing lŏn ia gơyut gơyâo mơ̆ng sui thun laih, jai hrơi pơđĭ kyar lu bruă mă, djơ̆ găl hăng boh tŭ yua, anŏ gêh găl mơ̆ng dua bơnah dêh čar či kiăng. Khua git gai ping gah ơi Nguyễn Phú Trọng pơdah pran jua đăo kơnang tal rai čuă jơmư anai mơ̆ng ơi Ukhnaagiin Khurelsukh amra djru hrŏm pơtrut kơtang hloh bruă ngă giăng mah pŭ ƀăn gru grua mơ̆ng đưm, biă mă ñu lơ̆m dua boh dêh čar anăp nao hơdor glăi tal 70 thun hrơi akŏ pơjing bruă ngă pŭ ƀăn Việt Nam –Mông Cổ amăng thun 2024.

Čơtlăm lơ 1/11, tơdơi mông bơkơtuai, Khua mir sir dêh čar ta, ơi Võ Văn Thưởng hăng Khua mir sir dêh čar Mông Cổ hmâo pơbưp mơnuih mă tơlơi pơhing phrâo, lăi pơhing kơ bôh tơhnal bơkơtuai. Ƀơi dlông jơlan rô nao rai giăng mah mơ̆ng hmâo klă hiam, Khua mir sir dêh čar ta lăi lĕ, pơ̆ anăp anai, tơlơi rô nao rai Việt Nam hăng Mông Cổ amra dưi hơkrŭ đĭ, pơđĭ kyar, anăp nao pơdŏng rơwang rô nao rai phrâo. Pơhiăp amăng mông jơnum hăng mơnuih mă tơlơi pơhing phrâo, Khua mir sir dêh čar ta, ơi Võ Văn Thưởng, pơsit, tơlơi rô nao rai giăng mah hăng gum hrŏm mơ̆ng hlâo kơplah wah dua bôh dêh čar Việt Nam hăng Mông Cổ glăk đĭ kyar klă hiam, hmâo lu bôh than phrâo giăm anai, biă ñu hơdôm bôh than amăng bruă kơđi čar, pơgang lŏn ia, rơnuk rơnua plơi pla hăng bơwih ƀong. Kiăng ngă brơi tơlơi rô nao rai dua bôh dêh čar đĭ kyar tơdăm, sit nik hăng ba glăi bôh tơhnal hloh dong pơ̆ anăp anai, Khua mir sir dêh čar ta brơi thâo hmâo tŭ ư hrŏm laih hăng Khua mir sir dêh čar Mông Cố lu jơlan gah yôm phăn, amăng anun tŭ ư pơtrut tơhnal pơkă pơđĭ tui lu hloh dua wot prăk pơhrui glăi mơ̆ng gơnam sĭ nao rai dua bơnah truh rơnoh 200 klăk dolar Mi amăng hơdôm thun pơ̆ anăp. Hlâo kơ anun, Khua mir sir dêh čar ta, ơi Võ Văn Thưởng hăng Khua mir sir dêh čar Mông Cổ hmâo lăng hmư̆ laih mông ngă lơphet kĭ pơkôl hơdôm mơta hră pơ-ar gum hrŏm kơplah wah hơdôm ding jum, gơnong bruă dua bôh dêh čar./.