Ơi Samdech Say Chhum pơdah pran hok mơ-ak hăng tal rai čuă sit nik Việt Nam amăng thun ngă giang mah Việt Nam - Kur, bơni kơ Khua git gai Ping gah dêh čar ơi Nguyễn Phú Trọng hơmâo abih pran jua čơkă ñu hăng grup khua mua. Ñu pơsit tong, dêh čar Kur amra hrŏm hăng dêh čar Việt Nam wai pơgang, djă pioh, pơtrut pơsur hăng lăi pơthâo brơi rơnuk tơdơi thâo tơlơi rô nao rai hiam klă kah hăng tơlơi rô nao rai kơplah wah 3 Ping gah, Kur - Việt Nam - Lao. Laih dong ơi Samdech Say Chhum hơmâo lăi pơthâo hăng Khua git gai Ping gah dêh čar ơi Nguyễn Phú Trọng hơdôm boh tơhnal pơčrông sai hăng Khua git gai pơ ala mơnuih ƀon sang dêh čar ơi Vương Đình Huệ, hơdôm bruă ƀơi dêh čar Kur giăm anai.

Khua git gai Ping gah tŭ jum Khua git gai pơ ala mơnuih ƀon sang gơnong glông dêh čar Kur

Khua git gai Ping gah dêh čar ơi Nguyễn Phú Trọng lăng yôm hơdôm boh than ba glăi mơng tal rai čuă mơng ơi Samdech Say Chhum, pơsit tong tơlơi rô nao rai kơplah wah dua bơnah kah hăng tlâo boh dêh čar Việt Nam - Lao - Kur pơgôp yôm phăn djru brơi rĭm boh dêh čar pơđĭ kyar, tơlơi hơdip mơnuih ƀon sang trơi pơđao, kyâo mơ-ak. Khua git gai Ping gah dêh čar pơlăi nao rai hơdôm hơdră anăp nao prong kiăng pơtrut tơlơi rô nao rai dua bơnah pơ anăp, sit biă ñu lĕ bruă pơbưp nao rai kơplah wah dua Ping gah, Kơnuk kơna, Khua pơ ala mơnuih ƀon sang dêh čar, ding jum, gơnong bruă, khul grup, ƀon lan hăng pơtô pơblang brơi rơnuk tơdơi thâo gru grua hiam klă kơplah wah Việt Nam - Kur.