Khua git gai ping gah ơi Tô Lâm pơdah pran jua mơak dưi bưp glăi ơi Tony Blair, lăng yom bruă ñu ngă khua dêh čar Anglê hlâo adih, ăt kah hăng ră anai ngă khua sang bruă kơsem min anăn Tony Blair, hơmâo pơtrut tui bruă ngă giăng mah Việt Nam-Angle.

Ơi Tô Lâm lăi pơtong, Việt Nam lăng tom bruă pơtrut ngă pŭ ƀăn yom hăng Angle, amăng anun lăng kơ bruă ngă hrŏm pơblih yua mrô, ba yua apui lơtrik, ia jâo rơgoh, pơblih pơčeh phrâo hăng git gai wai lăng bruă čar sa tơmeh phun bruă ngă hrŏm, kiăng ba tơlơi ngă giăng mah dua bơnah hiam klă, tŭ yua hloh rơnuk phrâo. Khua git gai ping gah dêh čar ta rơkâo kơ ơi Tony Blair ăt pơtrut ngă hrŏm plah wah hơdôm ding jum, anom bruă, sang bruă mơdrô, sang bruă kơsem min hăng sang hră gưl prong dua bơnah dêh čar, biă mă ñu amăng bruă kơnuk kơna mă bruă yua mrô, pơđĭ kyar hơđong kơjăp, ba yua ia jâo, apui lơtrik rơgoh, bruă pơtô hrăm, bruă ia jrao.