Ƀơi mông bơkơtuai nao rai, Khua mir sir dêh čar Singapore lăi pơtong, tal nao čuă jơmư sit nik anai mơ̆ng Khua git gai ping gah ơi Tô Lâm truh pơ dêh čar Singapore lĕ sa bruă mă yom biă mă, hăng bruă kiăng pơđĭ tui tơlơi rô nao rai giăng mah, bơnah ngă hrŏm hlom bom, djru pok rai sa jơlan hơdră phrâo kơ tơlơi giăng mah pŭ ƀăn amăng thun blan hơmâo anŏ tŭ yua yom kơ dua bơnah dêh čar, pơjing rai pran kơtang hăng tơlơi mơak phrâo kơ mơnuih ƀôn sang hăng sang bruă sĭ mơdrô kơ dua bơnah.

Lăi nao tơlơi pơđĭ kyar lăp bơni ƀơi Việt Nam, Khua mir sir dêh čar Singapore pơdah pran jua đăo kơnang Việt Nam amra djă bong kơjăp tal pơkă jing sa boh dêh čar hơmâo anăn bơwih ƀong huă beč bal amăng kual hăng rơnoh pơđĭ kyar GDP lu lăp bơni, anih pơhưč tuh pơ alin hăng hơmâo kơnuih hing ang amăng jar kmar. Khua git gai ping gah tŭ ư hăng tơlơi pơgôp hiăp mơ̆ng Khua mir sir dêh čar Singapore kơ bruă dua bơnah kơtưn ngă hrŏm, gum pơgôp nao rai laih anun hơdai gum hrŏm djop dêh čar amăng kual ASEAN kiăng pơđĭ tui tơlơi thâo, pran kơjăp, pơphun mă pô bong glăi hăng lu tơlơi lông lăng mơ̆ng gah rơngiao.