6 blan rơgao, bruă pơgang hưp ham ƀong kông ngăn hơmâo ngă kơtang, mă yua djŏp tơlơi hơmâo, bơwih brơi bruă đĭ kyar bơwih ƀong huă - mơnuih mơnam. Kơnuk kơna, hơdôm ding jum, anom bruă pơƀut git gai, pơsir hĭ tơlơi gun, tơlơi ngă tơnap, pơsir hơdôm kơčăo bruă, ring bruă kaih, ngă sui, ƀu tŭ yua. Hơdôm anom apăn bruă pơƀut pel ĕp, sem lăng, pơsir đut tơhnal kơđi tơlơi, bruă ƀong prăk kơnuk kơna, prai gơnam khưi khai, bruă ngă soh kơtang.

Mơ̆ng bruă hyu hơduah ĕp, jŭ yap jing rơkâo pơhrui glăi rơbêh 9.500 klai prăk hăng 600 ha lŏn; jao kơ anom apăn bruă hơduah ĕp 28 kơđi tơlơi ngă soh. Hrơi blan pơ anăp, bruă pơgang hưp ham ƀong prăk kơnuk kơna hơmâo ngă kơtang hloh, tŭ yua hloh, ngă giong djŏp bruă hơmâo jao tui Jơlan hơdră ngă bruă thun 2025 hăng hơdôm tơlơi pơtum glăi mơ̆ng Khua git gai Ping gah ơi Tô Lâm. Mông jơnum ăt tŭ ư ba 4 mơta kơđi hăng dua mơta bruă ngă soh pơ Khul git gai krăp lăng, pơtô brơi hơdră pơsir.