Tui hăng hră lăi pơthâo ƀơi mông jơnum, ngă tui Hră pơčrâo mrô 55 mơ̆ng Khul apăn bruă git gai ping gah, Ding jum kơđi čar, Kơnuk kơna prăp lui git gai pơčrâo bruă brơi pơphun ngă yang thun phrâo ƀong têt Bính Ngọ thun 2026 laih anun krăp lăng, pơčrâo bruă, pơtrut pran jua hăng ngă tui djơ̆ lăp.

Klah čun ƀơi mông jơnum, Khua git gai ping gah ơi Tô Lâm bơni kơ pran jua mă bruă glăm ba, gơgrong sit nik mơ̆ng djop anom bruă ping gah, mơnuih apăn bruă čar djop sang bruă kơnuk kơna mơ̆ng gơnong dlông truh pơ plơi pla, hơmâo ngă tui khut khăt djơ̆ hnơ̆ng tơlơi pơčrâo ba mơ̆ng Khul apăn bruă git gai ping gah dêh čar, kiăng pơhlom brơi mơnuih ƀôn sang ngă yang čơkă thun phrâo ƀong têt hơ̆k mơak, rơnuk rơnua, trơi pơđao, pơjing hrơi mông mơak mơai, hiam klă čơkă thun phrâo. Khă hnun, bruă mă pơ anăp ăt dŏ lu hăng kơtrâ̆o đôč, Khua git gai ping gah pơtrun hiăp, brơi abih bang glông bruă kơđi čar khom gum tơngan hrŏm tơgŭ mă bruă. Kơnong amăng 3 blan tal I akŏ thun anai, Khua git gai ping gah rơkâo, khom ngă giong bruă pơtô lăi, pok pơhai ngă tui akŏ pơjing, pơhrua nao Jơlan hơdră či mă bruă ngă tui Hră pơtrun ping gah tal XIV; pơphun truh kih, tŭ yua ruah khua pơ ala mơnuih ƀôn sang dêh čar tal XVI hăng ƀing pơ ala mơnuih ƀôn sang djop gưl rơwang bruă thun 2026-2031 amăng lơ 15/3 pơ anăp anai.