Rơgao 80 thun pơ klôn adih, anom bruă ngă hmua hăng pơgang ayuh hyiăng pơtong rơđah tơlơi gơgrong phun amăng bruă pơhlom djop mơnong ƀong huă, pơgang kông ngăn lŏn mơnai glai klô, pơlar lu djuai mơnong hơdip hăng ngă hơđong tơlơi bơwih ƀong huă mơ̆ng mơnuih ƀôn sang hơdôm hơpluh klăk čô. Mơ̆ng thun kơƀah mơ̆ng ƀong huă na nao, dêh čar Việt Nam hơmâo hrưn đĭ jing dêh čar sĭ mơdrô braih hăng gơnam đang hmua ba akŏ ƀơi lŏn tơnah.

Pơ ala kơ khua mua ping gah, kơnuk kơna, Khua git gai ping gah hơmâo jao Miđai mă bruă hnơ̆ng Sa kơ Ding jum Ngă hmua hăng Pơgang ayuh hyiăng, bơni kơ boh tơhnal anom bruă anai dưi ngă, lăi pơtong anŏ kơjăp kah hăng tơmeh phun atur tơlơi bơwih ƀong huă hăng pơđĭ kyar kơjăp. Khua git gai ping gah rơkâo abih bang amăng glông bruă ngă hmua ăt khom pơblih phrâo tơlơi pơmin, bruă ngă pơtrut kơtang hloh, tañ ngă tui djơ̆ tơlơi pơtrun jing tơlơi phiăn pơkă kơ bruă mă gah đang hmua, mơnuih ngă hmua, kual plơi pla; wai lăng kông ngăn lŏn glai, pơgang ayiăng adai rơhuông, bong glăi anŏ pơblih ayuh hyiăng lŏn tơnah, djru hrŏm ngă tui truh kih tŭ yua Hră pơtrun jơnum ping gah dêh čar tal XIV pơ anăp.