Khua git gai ping gah ơi Tô Lâm lăi pơtong, tơhan pơlih ia rơsĭ kual 4 hơmâo ngă djơ̆ tơlơi gơgrong ba jing tơhan blah ngă amăng mơnuih ƀôn sang, tơhan ngă bruă beč bal hloh mơ̆ng Kơnuk kơna, tơhan phun ngă tui tơlơi phiăn dêh čar hăng wai pơgang tơlơi rơnuk rơnua, hơđong amăng kual ia rơsĭ.

Ƀơi anăp kơ tơlơi kiăng rơnuk phrâo jai kiăng pơgang tong ten ngă pô guai lŏn ia hăng tơlơi dưi pơsit amăng jar kmar pơkă guai lŏn ia, Khua git gai ping gah rơkâo kơ tơhan pơlih ia rơsĭ, pơtum nao noa bruă ngă tui pă mơta bruă phun, amăng anun lăi pơtong tong ten tơlơi kiăng, tui jơlan hơdră mơ̆ng ling tơhan-pơgang lŏn ia ping gah ta pô pơphô; đing nao pơtô hrăm kơđi čar, tơlơi pơmin; akŏ pơjing tơlơi khin hơtai hăng tơlơi pơmin kơjăp mơ̆ng khua mua, ling tơhan; pơgang kơjăp tơlơi kiăng mơ̆ng ping gah pơtrun, pơphun hăng mă bruă hăng pran jua hiam klă tơpă hnơ̆ng; khom tong ten hăng ping gah, dêh čar, mơnuih ƀôn sang; găn rơgao tơlơi tơnap tap, amra ngă giong djop bruă jao tŭ yua hiam klă hloh.