Mơguah lơ 25/9, ƀơi Sang bruă pơ ala mơnuih ƀôn sang dêh čar, sit nik pơphun Jơnum ruah khua Ping gah Anom bruă pơ ala mơnuih ƀôn sang dêh čar tal 1, rơwang thun 2025-2030. Mông Jơnum hơmâo anăn “Akŏ pơjing Ping gah mă bruă klă, tơpă sit, kjăp kơtang amăng abih bang bruă; khua mua pơ ala mơnuih ƀôn sang khŏm pơplih kơtang mơn, mă bruă rơgơi hloh, kjăp tơkai hơyak amăng rơnuk pơđĭ kyar pơdrong sah, thâo rơgơi, hyuk hyak mơ-ak klă mơ̆ng djuai ania. Tui hăng Hră lăi pơthâo bruă kơđi čar, amăng rơwang thun 2020-2025, Khua mua pơ ala mơnuih ƀôn sang dêh čar hơmâo ngă giong tŭ yua djŏp tơlơi pơtrun, hơdră ngă bruă ba tơbiă; laih dong git gai lăp djơ̆, pơsir hmao tlôn, tŭ yua hơdôm bruă phrâo hơmâo, bruă ječ ameč, djơ̆ hăng tơlơi kiăng pơplih mơ̆ng lŏn ia ta, yŭ kơ tơlơi git gai mơ̆ng Ping gah.

Kơnong amăng bruă akŏ pơdong Ping gah, čih pơkra tơlơi pơtrun, tơlơi phiăn hơmâo lu tơlơi pơčeh tŭ yua. Amăng anun hmư̆ hing lĕ pơsit brơi Tơlơi pơtrun čih pơkra, pơhrua tui hơdôm tơlơi mơ̆ng Phiah phiăn dêh čar thun 2013, hơdôm tơlơi phiăn kơ anom bruă čar; hơdôm tơlơi pơtrun kơ dăp glăi anom bruă kơnuk kơna gưl tơring čar, dăp glăi anom bruă gưl să; pơtrun lu hră djru tơlơi hơdip mơnuih ƀôn sang hơđong kjăp, ba glăi tơlơi tŭ yua sit nik bơwih brơi mơnuih ƀôn sang...Rơngiao kơ anun, bruă krăp lăng jai hrơi klă mơn, bruă pơtom hiăp hơmâo ngă amăng abih bang bruă mơtăm...Nao pơhmư̆ hăng pơhiăp ƀơi mông jơnum, Khua git gai Ping gah ơi Tô Lâm lăi rơđah Lŏn ia ta glăk mut amăng rơwang thun đĭ kyar phrâo hăng tơlơi kiăng ngă prong biă mă, khŏm kiăng djŏp gưl ping gah, ƀing khua pơ ala, ƀing khua, mơnuih ping gah, mơnuih mă bruă čar, mơnuih mă bruă gah rơngiao khŏm pơđĭ tui pran jua gir run, pơplih tơlơi pơmin, gir ngă bruă. Khua git gai Ping gah pơƀuh rai 2 tơlơi kiăng, 5 jơlan ngă bruă yôm phun kiăng mông Jơnum anai pơčrông sai, ngă rơđah, pơhrua tui, čih pơkra giong, tŭ ư hrŏm či ngă tui amăng rơwang phrâo, amăng anun, kiăng pơđĭ tui pran jua anăp nao Mơnuih ƀôn sang amăng djŏp bruă mă mơ̆ng Anom bruă pơ ala mơnuih ƀôn sang dêh čar. Khua mua pơ ala mơnuih ƀôn sang dêh čar Việt Nam khŏm nao hrŏm jê̆ giăm, kar hăng sa drah kơtăk čơđeh asar hăng mơnuih ƀôn sang, sit nik jing “Anom bruă pơ ala mơnuih ƀôn sang yua Mơnuih ƀôn sang ruah đĭ, mơnuih ƀôn sang wai lăng, hăng bơwih brơi mơnuih ƀôn sang” - ƀu kơnong amăng tơlơi pơhiăp đôč ôh, ăt hơmâo amăng rim tơlơi phiăn, rim mông hơduah tơña, rim tơlơi pơtrun yôm, lêng kơ anăp nao tơlơi yôm anun lĕ: yâo mơak, trơi pơđao, mơai pô mơ̆ng Mơnuih ƀôn sang hăng tơlơi pơdrong sah mơ̆ng lŏn ia./.