Bơră ruai hăng lu mơnuih mă bruă ƀing adơi ayong adơi amai ngă kông ñơn mă hơdăng pơtâo, ơi Tô Lâm Khua git gai ping gah lăi pơtong, ƀu kơnong amăng thun blan hơkrŭ blah ayăt kiăng rơngai djuai ania đôč ôh, amăng abih thun blan mă bruă pơgang hăng man pơdong lŏn ia ta mơnuih ƀôn sang ngă pô bơkơnar tui jơlan hơdră xã hội chủ nghĩa, khul mơnuih mă bruă jing kông ñơn Việt Nam, amăng anun hơmâo kông ñơn mă hơdăng pơtâo, jing ƀing tơhan mă bruă phun, ba akŏ amăng bruă mă pơkra ming rai gơnam tam, rŭ pơdong hăng pơđĭ kyar bơwih ƀong huă kơ dêh čar.

Khua git gai ping gah ơi Tô Lâm rơkâo hăng čang rơmang ƀing kông ñơn laih anun anom bruă mă hơdăng pơtâo-kông ngăn amăng gŭ lŏn kiăng pơtong rơđah bruă mă phun anun lĕ: Pơđĭ tui boh tŭ yua bruă mă hăng boh tơhnal pran jua mă bruă pơkra pơjing rai gơnam tam. Abih bang amăng anom bruă kiăng pơblih phrâo bruă mă, pơtrut kơtang ba yua  măi mok rơdêh djru pran jua ană mơnuih mă bruă, măi mă bruă hơjăn, ba yua boh thâo ia rơgơi phrâo, pơblih yua mrô pioh git gai wai lăng amăng djop luh hơdăng pơtâo. Khua git gai ping gah rơkâo anom bruă mă hơdăng pơtâo hăng kông ngăn gŭ lŏn Việt Nam ăt đing nao djru ba sang dŏ, anŏ tŭ yua hăng pơgang ba tơlơi hơdip mơda kơ mơnuih mă bruă. Biă mă ñu akŏ pơdong anih dŏ, anŏ mă bruă rơnuk rơnua hơđong, hiam klă, thâo rơgơi, tong ten djru mơnuih mă bruă hơđong pran jua sui thun hăng bruă mă.