Khua ping gah tal sa, Khua mir sir dêh čar Cuba ơi Miguez Diaz-Canel hok mơak, bơni hơ-ơč kơ Ping gah dêh čar ta pơphun tŭ yua truh kih laih mông Jơnum ruah khua ping gah dêh čar tal 14, bơni hơ-ơč kơ Khul khua apăn bruă Ping gah, Ding jum kơđi čar hăng hơjăn ơi Tô Lâm - Mơnuih hơmâo mông jơnum đăo kơnang ruah ngă Khua git gai ping gah amăng rơwang bruă phrâo.

Khua git gai Ping gah ơi Tô Lâm pơsit, Jơnum ruah khua ping gah dêh čar tal 14 truh kih laih, ngă giong laih bruă jao prong, yom pơphăn. Jơnum anai pơƀut glăi abih bang bruă ngă tui Tơlơi pơtrun Jơnum ping gah tal 13, pơtŏng glăi 40 thun pơplih phrâo, hăng boh than ba glăi mơ̆ng Tơlơi pơtrun prong, Hơdră đĭ kyar bơwih ƀong huă - mơnuih mơnam, ba tơbiă jơlan hơdră ngă bruă kơ 5 thun pơ anăp dong, pơsit hơdôm bruă akŏ phun kơ lŏn ia ta kơñ pơgi, hăng tơlơi hơdip djuai ania Việt Nam amăng rơnuk đĭ kyar phrâo. Khua git gai Ping gah ơi Tô Lâm pơsit, Việt Nam lăng yom biă mă tơlơi rô nao rai giăng mah hăng Cuba, amra ngă djŏp bruă tơdah dưi ngă kiăng kjăp tui tơlơi gum pơgôp djuai ania, pok prong, pơđĭ tui anŏ tŭ yua bruă ngă hrŏm dua bơnah, yua kiăng klă kơ dua bơnah, yua kơ tơlơi rơngai, ngă hrŏm hăng đĭ kyar ƀơi rim kual hăng ƀơi rŏng lŏn tơnah./.