Pơhiăp pơphun mông jơnum anai, Khua git gai Ping gah ơi Tô Lâm pơsit 2 mơta bruă kiăng Kơnuk kơna sem lăng, pơgôp hiăp. Kơ bruă prăp rơmet Jơnum ruah khua ping gah tal 14, Khua git gai Ping gah lăi rơđah, ƀơi mông jơnum anai, Ding jum kơđi čar lăi pơthâo kơ Kơnuk kơna pơgôp hiăp hăng hră lăi pơthâo glăi hơdôm bruă dưi ngă hăng pơƀuh anăn khua amăng Khul gum bruă git gai Ping gah tal 14, mơnuih ngă Ding kơna Jơnum min hơduah ĕp kơđi Ping gah dêh čar tal 14 hăng plĕ hră ruah đĭ khua mut amăng Khul khua gum bruă git gai Ping gah, Jơnum min pel ĕp kơđi Ping gah tui tơlơi phiăn.

Lăi pơtŏng, anai jing bruă “yôm kơtang biă mă”, “gai kal mơ̆ng gai kal”, jing tơlơi yôm pơsit brơi mông Jơnum ruah khua ping gah dêh čar tal 14 tŭ yua, hăng tơlơi dưi đĭ kyar mơ̆ng lŏn ia ta amăng rơwang pơ anăp, Khua git gai Ping gah ơi Tô Lâm kiăng ruah mơnuih ngă khua khŏm kiăo tui lu tơlơi pơkă, kơ mrô mơnuih ngă khua, tui hơdră ruah mơnuih ngă khua Jơnum ruah khua ping gah dêh čar, hăng hơdôm tơlơi pơkă bơdjơ̆ nao. Khŏm pioh tơlơi gêh gal mơ̆ng Ping gah, mơ̆ng dêh čar, mơ̆ng djuai ania ta yơh phun; ngă bơkơnar plah wah tơlơi pơkă hăng mrô kiăng ruah; plah wah bruă tŏ tui, hơđong kjăp hăng đĭ kyar; plah wah tơlơi hơmâo lu mơnuih thâo wơ̆t hăng tơlơi phara hơjăn; plah wah tơlơi hơmâo pơtô pơjuăt wơ̆t hăng tơlơi rơgơi mơ̆ng pô; plah wah tơlơi đăo kơnang, tơlơi thâo rơgơi ngă bruă hăng jơlan đĭ kyar; amăng anun lăng yôm anŏ klă, tŭ yua, gơnam hơmâo mơ̆ng bruă mă, tơlơi gum djru, pơyơr pran mơ̆ng ƀing khua či ngă atur, gai rek pơkă brơi anŏ klă amăng bruă ruah khua./.