Đĭ pơhiăp amăng mông jơnum, Khua git gai ping gah lăi pơtong, Pác Bó-Trường Hà ƀu kơnong anăn anih hơkrŭ gru phun đôč ôh, dŏ jing gru lăp pơpŭ pơyom biă mă kơ tơlơi pơmin rơngai lŏn ia, pran jua gir run mă pô, kơtưn đĭ hăng hrưn nao pơ anăp kiăng rơngai mơ-ai pô mơ̆ng djuai ania Việt Nam.

Yua kơ anun yơh, bruă tuh pơ alin man pơdong sa boh sang hră đôm lăm, kơnuk kơna čem rông ba dua gưl anai, kiăng pơdah rai tơlơi đing nao, djru ba prong mơ̆ng ping gah, kơnuk kơna ta hăng bruă pơtô pơjuăt, kiăng pơblih hiam kơ bruă mă, anih dŏ, anŏ ƀong huă amăng sang hră, ngă gêh găl brơi ƀing nai pơtô wơ̆t hăng čơđai sang hră ƀơi guai dêh čar, đah mơ̆ng pơhrŏ ƀiă anŏ pleh ploh amăng kual, djru pơgang kơjăp guai dêh čar-rơnuk rơnua lŏn ia hăng pơtrut tơlơi bơwih ƀong huă mơnuih mơnam amăng kual rơnuč guai dêh čar. Khua git gai ping gah brơi thâo, thun blan pơ anăp amra pơphun lu anih, man pơdong sang hră, kiăng pơtrut hmar man pơdong 248 boh sang hră ƀơi 248 boh să guai dêh čar či kơdư hang, črăn tal blung a lĕ man pơdong 100 boh sang hră đôm lăm dua gưl sa hăng dua ƀơi hơdôm să amăng guai dêh čar, pioh akŏ pơjing anih anom hrăm hră hlom bom hiam klă kơ čơđai sang hră mơnuih djuai ƀiă ƀơi guai dêh čar.