Ƀơi mông tŭ jum, Khua git gai ping gah, ơi Tô Lâm lăi pơtong, dua boh dêh čar kah pơpha lu tơlơi djơ̆ hrŏm amăng bruă mă pơđĭ kyar dêh čar, hrŏm hăng tơhnal pơkă kiăng jing lŏn ia pơđĭ kyar hăng pơdrong sah, phrâo hloh tơdơi kơ 100 thun hơdor glăi hrơi akŏ pơdong kơnuk kơna dêh čar hăng Việt Nam lĕ truh thun 2045, India lĕ 2047, yua kơ anun kiăng kơtưn ngă hrŏm amăng lu bruă, boh nik ñu pơtrut bruă ngă hrŏm bơwih ƀong huă, sĭ mơdrô, tuh pơ alin lăp hăng anŏ gêh găl.

Khua git gai ping gah ơi Tô Lâm lăng yom Group Adani đing rai man pơdong, tuh pơ alin sui thun ƀơi Việt Nam, mơ̆ng anun kiăng djru hrŏm lir hơbit dua boh dêh čar bơwih ƀong huă tong ten Việt Nam-India. Khua git gai ping gah ăt čih pioh hơdôm tơlơi rơkâo mơ̆ng Group anai, laih anun rơkâo kơ khua mua group prăp lui mă bruă hăng djop ding jum, anom bruă, tơring čar hơmâo tơlơi dưi, kiăng pơčrong sai, ngă rơđah anŏ či kiăng, anăp mă bruă, mơ̆ng anun pơtrut pok pơhai ngă tui tañ hơdôm kơčăo bruă tuh pơ alin ƀơi Việt Nam.