Ƀơi mông tŭ jum, Khua git gai Ping gah lăi, tơlơi rai pơhmư̆ mơ̆ng ƀing kơsem min lŏn ia, ană mơnuih Việt Nam amăng dêh čar wơ̆t hăng čar rơngiao pơdah tơlơi yom kơtang biă: Việt Nam ƀu kơnong jing dêh čar či kơsem min đôč ôh, ăt jing gŏp ngă hrŏm rơgơi, thâo pơčeh phrâo mơ̆ng ƀing rơgơi kơhnăk kơsem min Việt Nam. Khua git gai Ping gah ơi Tô Lâm bơni kơ ƀing kơsem min lŏn ia hăng ană mơnuih Việt Nam pioh lu pran jua kơ Việt Nam amăng lu thun rơgao, čang rơmang ƀing rơgơi kơhnăk gum hrŏm, ƀu kơnong hăng tơlơi khăp đôč ôh, ăt hơmâo tơlơi rơgơi, thâo pơblang tong ten kiăo tui gru tơhnal sit nik, tơlơi rơkâo đĭ rơđah rơđông, tơpă sit, dưi ĕp, dưi ngă tui. Laih dong, Khua git gai Ping gah čang rơmang hăng lăng yom hơdôm kơsem min kơ Việt Nam amra jai hrơi nao hrŏm hăng bruă glăk kiăng pơsir jing tơlơi kiăng ngă ječ biă.

Hăng tơlơi kơtưn kiăng hrưn đĭ pơ anăp, samơ̆ ăt kiăng thâo pơpŭ, lua gŭ, pơhmư̆, kiăng rơgơi hloh, Khua git gai Ping gah ơi Tô Lâm pơsit, Việt Nam leng kơ lăng yom bruă pơtom hiăp, ngă hrŏm, pơpŭ kơ tơlơi phiăn jar kmar, ngă hrŏm lu bơnah khŏm tŭ yua, dưm kơnar kiăng akŏ pơjing sa Việt Nam rơngai, kjăp pran gơgrong pô, pơčeh phrâo, đĭ kyar hmar hăng hơđong amăng rơnuk phrâo.