Ƀơi mông tŭ jum, Khua git gai ping gah ơi Tô Lâm lăi pơtong, Ping gah, Kơnuk kơna Việt Nam lăng yom bruă pơđĭ kyar tơlơi rô nao rai giăng mah hăng dêh čar pơtao Angle, čang rơmang dua bơnah pơđĭ tui boh tơhnal dua bơnah hơmâo tŭ mă laih, ăt pơtrut tui tơhnal pơđĭ kyar hiam klă mơ̆ng tơlơi giăng mah dua bơnah, kiăng ba tơlơi ngă giăng mah mơ̆ng dua bơnah đĭ nao amăng sa hnơ̆ng phrâo, kiăng pơgang anŏ tŭ yua kơ mơnuih ƀôn sang dua bơnah hăng tơhnal pơkă pơđĭ kyar mơ̆ng rĭm boh dêh čar, djru hrŏm amăng bruă pơgang rơnuk rơnua, hơđong ngă hrŏm laih anun pơđĭ kyar kơjăp amăng kual hăng amăng rŏng lŏn tơnah.

Hrơi blan pơ anăp adih, kiăng pơtrut kơtang hloh tơlơi rô nao rai dua bơnah ping gah, khua git gai ping gah ơi Tô Lâm, rơkâo dua bơnah sem lăng tơlơi gêh găl pok pơhai ngă tui lu bruă mă pơčrong sai tơlơi pơtô djơ̆, kah pơpha nao rai tơlơi pơhing hăng tơlơi pơmin kiăng mơ̆ng rim ping gah lăng nao amăng kual, amăng rŏng lŏn tơnah laih anun hơdôm mơta tơlơi mơ̆ dua bơnah đing nao.