Amăng tal nao čuă sit nik dêh čar Phần Lan mơ̆ng lơ 20-22/10, ƀơi Helsinki, Khua git gai Ping gah dêh čar Việt Nam ơi Tô Lâm hơmâo mông bưp Khua git gai Ping gah dêh čar Phần Lan yă Tiina Sandberg. Ƀơi mông bưp, ơi Tô Lâm, Khua git gai Ping gah dêh čar ta brơi thâo, amăng tal čuă jơmư anai, dua bơnah tŭ ư pơđĭ tui tơlơi rô nao rai ngă gŏp yom.

Pơ anăp, Khua git gai Ping gah ơi Tô Lâm kiăng dua ping gah jơnum lu hloh, pơtrut tui tơlơi ngă hrŏm dlăm, sit nik hloh kiăo tui hơdôm bruă jơnum pơčrông sai amăng khul grup, pơčrông sai hơdôm tơlơi gal, tơlơi pơtô djơ̆; ngă hrŏm na nao, hăng gum hrŏm ƀơi hơdôm mông jơnum ping gah lu bơnah mơ̆ dua Ping gah ngă ding kơna, amăng anun hơmâo Jơnum hơdôm Ping gah Cộng sản hăng Kôn ñơn jar kmar; pơtrut tui tơlơi gơgrong bruă mơ̆ng rim Ping gah ăt kah hăng hơdôm Khul giăng mah amăng bruă pơthâo nao rai tơlơi pơhing, pơphun jơnum pơbưp gru grua, mơnuih ƀôn sang kiăng ngă dlăm tui tơlơi rô nao rai gum pơgôp hăng thâo hluh nao rai kơplah wah mơnuih ƀôn sang dua bơnah; djru ba mơnuih ƀôn sang Việt Nam hăng Phần Lân ƀơi hơdôm boh dêh čar glăk hơdip mơda, hrăm hră, mă bruă pơ anih glăk hơdip.