Ƀơi mông tŭ jum, Khua git gai ping gah, ơi Tô Lâm lăi pơtong, Việt Nam amra gum hrŏm dêh čar Cuba, kiăng ngă kơjăp tui tơlơi rô nao rai giăng mah adơi ayong sit nik, thâo gum pơgôp nao rai, tong ten plah wah dua bơnah ping gah, Kơnuk kơna hăng mơnuih ƀôn sang mơ̆ng dua boh dêh čar. 

Khua git gai ping gah ơi Tô Lâm, rơkâo khua mua pơ ala mơnuih ƀôn sang dêh ča Cuba ăt đing nao djru lu hloh kơ bruă rô nao rai, ngă hrŏm dua bơnah, tuh pơ alin brơi bruă bơwih ƀong huă, sĭ mơdrô hăng ngă gêh găl brơi djop kơčăo bruă ngă hrŏm đang hmua, apui lơtrik, ia jâo hơdjă, pơkra ming mă, boh thâo ia rơgơi ngă hmua pla pơjing, pơkra ia jrao gun, bơwih brơi kơ bruă rŭ pơdong hăng pơđĭ kyar dua bơnah dêh čar. Laih dơ̆ng, ăt rơkâo dua bơnah hơdai gum hrŏm kơtưn bưp pơčrong sai nao rai lu hloh, kah pơpha tơdruă tơlơi thâo thăi hăng bruă mă sit nik, biă mă ñu lơ̆m dêh čar Việt Nam hlăk prăp lui jơnum ruah khua ping gah đơ đam dêh čar tal XIV laih anun dêh čar Cuba ăt či pơphun jơnum ruah khua ping gah amăng dêh čar tal IX amăng thun 2026.