Ƀơi mông tŭ jum, Khua git gai Ping gah ơi Tô Lâm pơsit, Slovakia jing gơyut jê̆ giăm, kjăp pran jua biă mă hăng Việt Nam; bơni kơ Kơnuk kơna hăng mơnuih ƀôn sang Slovakia leng kơ dong yua, gum pơgôp hăng mơnuih ƀôn sang Việt Nam amăng 75 thun rơgao. Ơi Tô Lâm kiăng dua bơnah pơtrut kơtang hloh bruă ngă hrŏm pơkra gơnam gah ling tơhan, pơtŏp tơhan, bong kjăp tơlơi rơngai...

Khua git gai Ping gah ơi Tô Lâm kiăng dua bơnah pơphun na nao bruă jơnum pơčrông sai djŏp gưl; laih dong pơtrut tui dong boh tŭ yua hơdră lăi pơthâo pơphô bruă hăng ngă hrŏm glăk hơmâo, kiăng pơđĭ tui tơlơi rô nao rai sit nik, abih bang hlom bom, hăng hơđong kjăp; laih dong ngă gêh gal kiăng hơdôm ding jum, anom bruă hăng anom mơdrô prong dua boh dêh čar pơtruh hrŏm, pok prong tơlơi ngă hrŏm, ba tơlơi bơwih ƀong hăng boh thâo ia rơgơi jing gong tơmeh phun amăng bruă ngă hrŏm dua bơnah, pơtrut hloh ngă hrŏm gru grua, pơtô hrăm, tuai hyu ngui hăng pơbưp mơnuih ƀôn sang.