Anai lĕ jơnum blung a tơdơi kơ Khul git gai hơmâo akŏ pơjing, pơdah pran ngă bruă ječ ameč, đing nao hloh, klă hloh, pơphun mơtăm ngă hơdôm bruă jao pơprong mơng Ping gah amăng rơwang phrâo. Pơđut mông mă bruă, Khua git gai Ping gah dêh čar ơi Tô Lâm lăi rơđah nao tơlơi pơmĭn, ƀing ta glăk prap lui rơwang kơđŏm glăi gru grua yôm phăn anun lĕ hơdor glăi 100 thun lŏn ia ta tui tơlơi git gai mơng Ping gah Cộng sản Việt Nam hăng 40 thun ngă tui tơlơi pơtrun pơjing lŏn ia amăng rơwang đĭ chủ nghĩa xã hội.

Lăng glăi 100 thun lĕ hrơi mông kiăng ƀing ta lăng glăi abih bang glông jơlan Ping gah git gai lŏn ia: mơng blah wang pơklai rơngai, pơlir lŏn ia ta, truh pơ bruă pơjing hăng wai pơgang lŏn ia xã hội chủ nghĩa; mơng tơhnal pơkă akŏ bruă pơtum pơƀut truh pơ hơdôm bruă pơplih phrâo djop mơta; mơng sa boh lŏn ia rin rơpa jing sa boh dêh čar hơmâo kơdrưh ang jai prong tui amăng jar kmar. Anai lĕ tơlơi dưi kiăng ngă rơđah ƀiă dong hơbô̆ bruă pơđĭ kyar, hơdôm tơlơi dưi, anŏ aka ƀu klă, tơlơi ba truh hăng tơlơi pơhrăm glăi. Yôm ƀiă dong lĕ prap lui boh tơhnal hăng tơlơi sit nik brơi hơdôm hơdră bruă yôm phăn amăng rơwang pơđĭ kyar phrâo, anăp nao truh thun 2045 hăng ataih ƀiă dong lĕ jơlan gah git gai pơđĭ kyar lŏn ia truh thun 2130.