Amăng mông nao čuă, Khua git gai Ping gah tơring čar Lâm Đồng lăi pơthâo boh than bruă mă mơng Jơnum ruah khua mua đơ đam dêh čar tal XIV mơng Ping gah, hơdôm bruă jao akŏ phun, yôm phăn kiăng tañ ba tơlơi pơtrun mơng Jơnum tal XIV mut amăng tơlơi hơdip mơda. Ơi Y Thanh Hà Niê Kdăm lăng yôm tơlơi gir run mơng Ping gah, gong gai hăng mơnuih ƀôn sang kual bul pơtâo Phú Quý amăng pơđĭ kyar bơwih ƀong huă-mơnuih mơnam pơlir hăng wai pơgang kjăp rơnuk rơnua-hơđong, ngă pô ƀơi bul pơtâo; laih dong mơ-it nao tơlơi pơpŭ thun phrâo tơl abih bang mơnuih apăn bruă, mơnuih Ping gah, ling tơhan hăng mơnuih ƀôn sang amăng bul pơtâo.

Ƀrô tal anai, grup hyu mă bruă hơmâo jao 67 anung gơnam tết brơi Ping gah, Jơnum min pơ ala mơnuih ƀôn sang, Jơnum min mơnuih ƀôn sang, Jơnum min djop djuai ania mơnuih mơnam Việt Nam kual bul pơtâo Phú Quý, hrŏm hăng ling tơhan glăk mă bruă ƀơi anai. Tŏ tui, grup hyu mă bruă nao čuă, pơpŭ thun phrâo Puih kơđông tơhan wai pơgang tơdrun kompăn Phú Quý; ƀơk gơnam, juh alum pran jua ƀing apăn bruă, ling tơhan, pơpŭ hơ-ơč anom bruă amra pơgiong bruă jao wai pơgang kjăp tơlơi ngă pô, hơđong kual bul pơtâo plao ia rơsĭ amăng bơyan tết tui phiăn juăt Bính Ngọ 2026.