Mông jơnum anai hơmâo pơtruh mơ̆ng ataih lăng amăng tivi hăng hơdôm boh să Ea Khăl, Ea H’leo hăng Ea Hiao. Ƀơi mông jơnum, Jơnum min djŏp djuai ania mơnuih mơnam Việt Nam tơring čar Dak Lăk pơƀuh anăn, anih dŏ, bruă mă mơ̆ng ƀing tơbiă anăn či ruah. Tui anun, anih plĕ hră mrô 4 hơmâo 5 čô mơnuih tơbiă anăn ruah amăng khul khua pơ ala mơnuih ƀôn sang dêh čar; anih plĕ hră mrô 22 hơmâo 5 čô tơbiă anăn ruah ngă khua pơ ala mơnuih ƀôn sang tơring čar.

Ƀing tơbiă anăn ngă khua lăi pơthâo bruă gơñu či ngă, pơƀut kơ bruă pơtrut đĭ kyar bơwih ƀong huă - mơnuih mơnam, pơđĭ tui tơlơi hơdip mơnuih ƀôn sang, biă ñu lĕ kual mơnuih ƀôn sang djuai ania ƀiă; pơplih klă anom bruă kơnuk kơna, mă yua boh thâo mrô hăng krăp lăng kơtang hloh bruă ngă tui tơlơi pơtrun, tơlơi phiăn.

Pơhiăp ƀơi anăp mơnuih nao plĕ hră, ơi Lương Nguyễn Minh Triết, Ding kơna git gai Ping gah, Khua git gai Ping gah tơring čar Dak Lăk pơsit, tơdah hơmâo mơnuih ƀôn sang đăo kơnang ruah ngă ding kơna pơ ala mơnuih ƀôn sang dêh čar tal 16 amra gir ngă djŏp bruă mơ̆ng sa čô mơnuih pơ ala brơi mơnuih ƀôn sang, pơhiăp tom hăng mơnuih ƀôn sang lu hloh, lăi pơthâo glăi djŏp tơlơi rơkâo, tơlơi kiăng mơ̆ng mơnuih ƀôn sang hăng anom bruă prong, dưi pơsir brơi./.