Ƀơi mông mă bruă, lăi nao kơ tơlơi hiam mơak, rơgao hăng anai giăm 10 thun glăi mă bruă ƀơi Lạng Sơn, Khua git gai ping gah ơi Nguyễn Phú Trọng pơdah pran jua hok mơak ƀơi anăp kơ tơlơi pơblih phrâo ƀơi tơring čar anai hăng pơčrâo rơđah, hơdôm bruă ngă aka ƀu klă, dŏ kơƀah: Hơbô̆ bơwih ƀong huă mơ̆ng tơring čar dŏ anet, ƀiă đơi, pơđĭ kyar aka lăp hăng anŏ gê găl hơmâo hlâo amăng tơring čar. Rơnoh mă bruă pơhrŏ ƀun rin hăng pơhrŏ ƀun rin kiăng hơđong aka lăp, dŏ lu tơlơi tơnap, boh nik ƀơi kual ataih, kual asuek, kual mơnuih ƀôn sang djuai ƀiă....

Kơ bruă mă amăng thun blan pơ anăp, Khua git gai ping gah ơi Nguyễn Phú Trọng rơkâo,Ping gah tơring čar Lạng Sơn pơkă tơhnal bruă pơtrun, bruă kiăng ngă hăng rơnoh pơblih kơtang, pơtum git gai, pơčrâo bruă, brơi pơblih phrâo kơtang hloh, boh nik ñu pơđĭ kyar bơwih ƀong huă mơnuih mơnam, kah hăng Hră pơtrun mơ̆ng Ping gah tơring čar hơmâo pơtong laih. Amăng anun kiăng pơtong rơđah, bruă pơđĭ kyar bơwih ƀong huă lĕ ƀu kơnong hơjăn ƀơi tơring čar đôč ôh, yôm hloh dơ̆ng djru hrŏm pơđĭ kyar bơwih ƀong huă kơ dêh čar, biă mă ñu gah kual Kơdư dêh čar, laih dơ̆ng kơtưn bruă ngă giăng mah mơak, đăo kơnang nao rai hăng lŏn ia gơyut gơyâo dêh čar Khač.