Nao čơkă Khua git gai pơ ala mơnuih ƀôn sang Bulgaria pơ Sang hră Đại học Quốc gia Hà Nội hơmâo Kơ-iăng khua git gai pơ ala mơnuih ƀôn sang, Khua Jơnum min anom bruă pơtom hiăp mơ̆ng Ƀirô khua pơ ala mơnuih ƀôn sang, Kơ-iăng Khua Jơnum min anom bruă pơtom hiăp.

Ƀơi mông tŭ jum, Khua Sang hră Đại học Quốc gia Hà Nội Lê Quân hok mơ-ak lơ̆m hơmâo čơkă Khua git gai pơ ala mơnuih ƀôn sang dêh čar Bulgaria hrŏm hăng ƀing khua pơprong mơ̆ng lŏn ia rai čuă hăng bưp ƀing nai pơtô, čơđai sang hră. Hăng gru hiam mơ̆ng đưm hlâo mơ̆ng dua boh dêh čar, Khua sang hră Lê Quân đăo kơnang Sang hră Đại học Quốc gia Hà Nội hăng hơdôm boh sang hră gưl prong mơ̆ng dêh čar Bulgaria amra pơbưp nao rai, ngă hrŏm dlăm hloh dong amăng bruă pơtô hrăm, kơsem min boh thâo ia rơgơi, anai ăt jing phun akha yôm hloh kơ tơlơi rô nao rai ngă gŏp kjăp phik mơ̆ng dua boh dêh čar. Khua git gai pơ ala mơnuih ƀôn sang dêh čar Bulgaria mơ-it tơlơi tơña bla kơ ƀing khua hrŏm hăng čơđai sang hră gưl prong Đại học Quốc gia Hà Nội hăng lăi pơthâo akŏ bruă hơmâo anăn “Tơlơi rô nao rai dua bơnah kơplah wah Bulgaria hăng Việt kiăo tui mơta lăng mơ̆ng djŏp rơnuk bơwih ƀong huă hăng gru grua”.