Thun 2024 hăng amăng 3 thun blung a pơphun ngă Tơlơi pơtrun jơnum ping gah djŏp gưl, tơring čar Bình Định pơƀut ngă bruă khut khăt, dưm kơnar djŏp hơdră đĭ kyar bơwih ƀong huă - mơnuih mơnam, pơhlôm pơgang lŏn ia - rơnuk rơnua, akŏ pơdong anom bruă kơđi čar ƀơi tơring hăng hơmâo lu boh than tŭ yua. Truh ră anai hơmâo 16/22 rơnoh pơkă yôm mơ̆ng rơwang thun 2020 - 2025 dưi ngă hăng rơgao rơnoh pơkă. Mrô gơnam pơkra rai đĭ 7,6%, dong mrô 17/63 boh tơring čar ƀôn prong amăng dêh čar. Bruă bơwih ƀong hơmâo rơbêh 117.000 klai prăk, dong mrô 5/14 boh tơring čar ƀôn prong amăng kual Tong Krah...Pơhiăp ƀơi mông ngă bruă, Khua git gai pơ ala mơnuih ƀôn sang dêh čar Vương Đình Huệ bơni kơ hơdôm boh than mơ̆ Bình Định hơmâo ngă, djru ba tơlơi bơwih ƀong huă rŭ glăi hăng đĭ kyar, dong amăng grup đĭ kyar mơ̆ng kual.

Amăng hrơi blan pơ anăp, tơring čar Bình Định gir truh pơ thun 2030 jing tơring čar đĭ kyar ba jơlan hlâo amăng kual Kơdư Tong krah hăng ter hang ia rơsĭ Tong Krah; jing tơring čar phun đĭ kyar bơwih ƀong ia rơsĭ; anih tuai hyu ngui lu. Khua git gai pơ ala mơnuih ƀôn sang dêh čar kiăng tơring čar Bình Định gir run ngă truh kih djŏp bruă hơmâo jao; čang rơmang hăng đăo kơnang Ping gah, gong gai hăng mơnuih ƀôn sang tơring čar Bình Định amra pơtrut tui pran jua, kơdrưh kơ-ang “Tây Sơn”, tañ ngă truh kih tơlơi čang rơmang truh pơ thun 2030, Bình Định jing tơring čar đĭ kyar dong mrô hlâo amăng kual Kơdư Tong Krah hăng kual Ter hang ia rơsĭ Tong Krah.

Amăng tal hyu mă bruă, Khua git gai pơ ala mơnuih ƀôn sang Vương Đình Huệ pơtrut Phun kông ti bơwih ƀong ƀơi ia rơsĭ Việt Nam djru ba tơring čar Bình Định man pơkra 100 boh sang hơdor tơngia hăng nua 5 klai prăk.