Mơguah lơ 22/11, amăng hơdôm hrơi nao čuă sit nik dêh čar Kur, Khua git gai pơ ala mơnuih ƀon sang dêh čar ơi Vương Đình Huệ hăng ƀing khua mua pơprong mơng dêh čar ta hơmâo mông bưp Kơ-iăng Khua git gai tơring čar Kampong Thom: nao čuă, mă bruă hăng hơdôm boh kông ti gah grup kơsu Việt Nam ƀơi tơring čar Kampong Thom, dêh čar Kur. Amăng mông nao čuă, mă bruă hăng kông ti kơsu Tân Biên, Khua git gai pơ ala mơnuih ƀon sang dêh čar ơi Vương Đình Huệ pơdah pran jua hok mơ-ak lơ̆m găn nao hơdôm đang pla kơsu mơtah mơda. Phun kơsu mơtah mơda pơdah tơlơi rô nao rai kơplah wah Việt Nam hăng Kur.

Khua git gai pơ ala mơnuih ƀon sang dêh čar lăi pơtong, hơdôm anŏ hiam klă anai rơngiao kơ tơlơi gir run mơng khua mua hăng khul grup, mơnuih apăn bruă  amăng kông ti ăt kiăng lăi nao tơlơi dong yua, gum djru, ngă hrŏm, ngă gêh gal mơng Kơnuk kơna Kur, hăng ƀơi anăp lĕ gong gai tơring čar Kampong Thom. Ƀrô tal anai, Khua pơ ala mơnuih ƀon sang dêh čar lăng yôm hăng pơpŭ bơni gong gai tơring čar, djop gơnong bruă, anom bruă amăng tơring čar, tơring glông hơmâo dong yua, ngă gêh gal brơi bruă mă mơng kông ti.