Đĭ pơhiăp amăng mông jơnum, Khua git gai pơ ala mơnuih ƀôn sang dêh čar ơi Trần Thanh Mẫn brơi thâo, lăng glăi rơwang ngă bruă tal XV lĕ sa rơwang ngă bruă tơnap tap, lu tơlơi lông yua klin Covid-19 lar hyu, rŏng lŏn tơnah hơmâo lu tơlơi pơplih, amăng lŏn ia ƀuh lu hơjan kơthel, laih dong pok pơhai dưm dăp anih anom hơbot. Lơm anun, Khua pơ ala mơnuih ƀôn sang dêh čar hơmâo gir run, gơgrong ngă tui jơlan gah, hơdră bruă mơng Ping gah, tơlơi phiăn mơng kơnuk kơna hăng hơdôm bruă pơprong hloh. Đa hơmâo hrơi blan ƀing Khua pơ ala mơnuih ƀôn sang khŏm mă bruă tơhrơi kah hăng mlăm, mă bruă hrơi năm, hrơi tơjuh kiăng djru ngă hơbot anih anom, khul grup brơi ngă bruă klă, tŭ yua…

Khua git gai pơ ala mơnuih ƀôn sang dêh čar ơi Trần Thanh Mẫn lăng yôm hơdôm boh than dưi ngă amăng thun 2025 lăi phara hăng amăng ha rơwang ngă bruă tal XV. Pơphun bruă pơplông pơ anăp anai, Khua git gai pơ ala mơnuih ƀôn sang dêh čar brơi thâo, rơwang ngă bruă tal XVI kơtrâ̆o biă, kiăng tŏ tui pơplih tơlơi pơmĭn amăng čih pơkra tơlơi phiăn, ngă tui hơdôm tơlơi črâo trun, hơdôm tơlơi klah čun mơng Ding jum kơđi čar, Khul git gai Ping gah, kiăng tơlơi bơwih ƀong huă-mơnuih mơnam pơđĭ kyar, pơhlôm pơgang hơđong, pơjing anih anom kơđi čar. Hơnong pơkă rơnuč lĕ hrưn đĭ tơlơi hơdip mơda kơ mơnuih ƀôn sang.