Ƀrô tal hơdor glăi 96 thun akŏ pơdong ping gah; Jơnum ruah khua pơ ala ping gah đơ đam dêh čar tal 14 tŭ yua truh kih hiam klă; hơdor glăi 80 thun hrơi ruah khua blung a mơ̆ng anom bruă pơ ala mơnuih ƀôn sang Việt Nam hăng prăp lui čơkă ngă yang thun phrâo djuai ania ta thun Bính Ngọ, mơguah lơ 27/1, Khua git gai pơ ala mơnuih ƀôn sang dêh čar ơi Trần Thanh Mẫn nao dưm guang bơnga hơdor glăi Khua gum bruă git gai pơ ala mơnuih ƀôn sang hơđăp, rơgom ơi Bùi Đăng Đoàn ƀơi anih  hơdor pioh kơ ñu či să Ứng Thiên, ƀôn prong Hà Nội, khua git gai hơđăp ping gah, rơgom ơi Trường Chinh, khua hơđăp git gai pơ ala mơnuih ƀôn sang dêh čar rơgom ơi Lê Quang Đạo; nao čuă pơpŭ thun phrâo kơ ơi Nông Đức Mạnh, Khua hơđăp git gai ping gah dêh čar, yă Nguyễn Thị Kim Ngân, Khua hơđăp git gai pơ ala mơnuih ƀôn sang dêh čar.

Ơi Trần Thanh Mẫn, Khua git gai pơ ala mơnuih ƀôn sang dêh čar lăi, hơdôm hnơr ngă khua pơ ala mơnuih ƀôn sang dêh čar truh ră anai, ăt kiăo tui kru, tơlơi pơmin prong mơ̆ng ƀing nao hlâo, ƀu pơdơi ôh, ƀư̆ pơkra glăi pran jua, tơlơi pơmin, khin hơtai pơyơr kơ bruă mă; djru hrŏm akŏ pơdong sang bruă khua pơ ala mơnuih ƀôn sang dêh čar, jai hrơi jing mơnuih ƀôn sang ngă khua pô, git gai lŏn ia hăng tơlơi phiăn, thâo rơgơi, kơhnâo kơhnăk, phrâo hloh; lăp hăng tơlơi đăo kơnang mơ̆ng Ping gah, Kơnuk kơna hăng Mơnuih ƀôn sang.

Khua git gai pơ ala mơnuih ƀôn sang dêh čar lăi, pơ anăp anai, anom bruă pơ ala mơnuih ƀôn sang ăt amra tŏ tui pơblih phrâo pơphun bruă mă, kiăo tui tơlơi kơhnâo ia rơgơi hăng pơblih phrâo kiăng ngă djơ̆ bruă pơtrun klă hloh tui hăng anŏ hơmâo sit nik amăng rơnuk phrâo ƀơi lŏn ia;

Ăt gir run hloh, pơblih tơlơi dŏ dong ƀong huă, hơdră mă bruă, pơblih kơtang tơlơi pơmin pran jua čih pơkra tơlơi phiăn dêh  čar, tui hăng jơlan gah kơjăp tui, tong ten pơđĭ kyar; pơtrut bruă mă pơblih kơtang hloh, khul mơnuih mă bruă thâo rơgơi, pơblih kơtang; pơtum ngă giong, sa hnơ̆ng pơkă amăng tơlơi phiăn djơ̆ hăng rơnoh pơđĭ kyar tañ, kơjăp kơ lŏn ia, khut khăt kiăo tui ngă bruă kiăng hơmâo boh tơhnal hiam klă mă bruă mrô ia rơgơi kơ abih bang anom bruă pơ ala mơnuih ƀôn sang dêh čar.